Student sê jammer oor ‘bazoeka’-uitlating

Luvuyo Menziwa. Foto: Facebook

Luvuyo Menziwa, die geskorste lid van die Universiteit van Pretoria (Tuks) se studenteraad wat in 2016 in ʼn Facebook-plasing gesê het hy wil wit mense met ʼn AK-47 of ʼn bazoeka doodskiet, het om verskoning gevra vir dié omstrede plasing.

Dit volg nadat die gelykheidshof Menziwa verlede week aan haatspraak en aanhitsing tot geweld skuldig bevind en hom beveel het om op sy Facebook-blad om verskoning vir sy optrede én die nadelige gevolge daarvan te vra.

Die betrokke plasing, wat Menziwa in Augustus 2016 op sy Facebook-profiel geplaas het, het ʼn lys redes ingesluit waarom hy wit mense haat, onder meer “wit voorreg, wit arrogansie, wit monopolie van kapitaal en wit meerderwaardigheid”.

“Ter afsluiting, f** wit mense. Gee my net ʼn AK-47 of ʼn bazoeka sodat ek die regte ding kan doen en hierdie demoonbesete mense kan doodmaak,” het die inskrywing gelui.

AfriForum-Jeug het na aanleiding hiervan klagtes teen Menziwa ingedien.

Die Facebook-plasing wat daartoe gelei het dat Menziwa aan haatspraak en aanhitsing tot geweld skuldig bevind is.

Menziwa het Maandag op sy Facebook-blad ʼn brief geplaas waarin hy erken dat die “aanstootlike aard” van dié inskrywing “tot chaos of ʼn bloedbad kon gelei het” aangesien mense na hom opgekyk het weens sy posisie in Tuks se SR.

“Ek wil daarom [die plasing] terugtrek en om verskoning vra dat ek sodanige uitlating kon maak, wat geweld aanhits, skadelik is en die regte van die ‘wit gemeenskap’ skend. Ek vra onvoorwaardelik om verskoning en verstaan nou as leier kan ek nie sulke stellings of uitlatings maak wat die lewe van ander landsburgers in gedrang plaas of die nasie nog verder verdeel nie.”

Menziwa het gesê hy besef daar is ernstige gevolge vir sulke uitlatings en dra wel die gevolge vir sy “roekelose uitlatings”. “[Ek dra die gevolge] deurdat ek ʼn jaar lange skorsing van die Universiteit van Pretoria moes uitdien, finansiering vir my studie verloor het, asook 30 uur gemeenskapsdiens sal verrig as vorm van herstellende en versoeningsgeregtigheid.”

Hy het die brief afgesluit deur ander aan te moedig om by te dra tot die bou van ʼn nierassige samelewing.

Rikus Delport, woordvoerder van die UP, het aan Maroela Media bevestig dat Menziwa steeds ʼn ingeskrewe student van die UP is nadat hy hom verlede jaar aan die universiteit se dissiplinêre proses onderwerp het. “Vanweë die vertroulike en sensitiewe aard van die dissiplinêre proses kan die universiteit egter nie meer inligting oor die student bekend maak sonder sy toestemming nie,” het Delport gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

57 Kommentare

jongste oudste gewildste
Irene

So maklik om jammer te se nou dat hy aangekla word hoort nie op univ nie

Hanna

Wat het geword van Malema wat sè wit rasiste gaan nie meer toegelaat word om net verskoning te vra nie. Dis nie meer goed genoeg nie. Is die nou goed genoeg?

Ria Maritz

Bedoel jy dit … baie maklik om jammer te sê.

adriana

Sorry ou – jou verskoning word nie aanvaar nie – want jy bedoel dit nie .

Jou foto sal vir altyd in my kantoor hang om seker te maak dat ek jou nie eendag per ongeluk in diens neem nie.

Ek het foto’s van al julle ouens en dames met julle rassehaat uitlatings.

Jy gaan nog swaar dra met jou rassehaat- bagasie. Kry vir jou.

Giel

Ag asseblief. n Jakkals verander net van kleur!!!!