Studente in hof oor geweld, diefstal

Tien studente aan die Walter Sisulu Universiteit in die Oos-Kaap sal vandag in die hof verskyn ná ʼn gewelddadige betoging Vrydag.

Kapt. Jackson Manatha, woordvoerder van die polisie, het gesê die studente is almal Vrydag op die instansie se Butterworth-kampus in hegtenis geneem en aangekla van openbare geweld en opsetlike saakbeskadiging.

“Die studente, van wie ses vroue en vier mans is, was deel van ʼn groep studente wat die N2 afgesper en na bewering motors met klippe bestook het. Die verdagtes, tussen 21 en 27 jaar oud, sal in die Butterworth-landdroshof verskyn,” het Manatha gesê. Dit is nie duidelik of die betoging met die landwye betogings oor universiteitsfooie verband hou nie.

Manatha het gesê nog twee manstudente is intussen in hegtenis geneem en aangekla van huisbraak en diefstal. “Hulle word verbind met ʼn inbraak by ʼn winkel op die universiteitskampus. Hierdie twee verdagtes, onderskeidelik 22 en 25 jaar oud, sal ook Maandag in die Butterworth-landdroshof verskyn.”