Studenteraad-president ‘laat wittes nie welkom voel’ by Kovsies

Die Marthinus Theunis Steyn-standbeeld op die Universiteit van die Vrystaat se hoofkampus. (Foto: UVS)

Die boodskap wat Sonwabile Dwaba, nuutverkose studenteraad-president (SR-president) van die Universiteit van die Vrystaat (UV) en EFF-verteenwoordiger Donderdag uitbasuin het, is dat wit studente en hul geskiedenis nie welkom is op kampus nie.

Dit is die mening van Tammy Wessels, die VF Plus se nasionale jeugleier, in reaksie op Dwaba se uitlatings kort ná sy verkiesing.

Dwaba het onder meer na die standbeeld van oud-president MT Steyn verwys en studente versoek om hom te help om “Steyn te laat val”.

“Die UV se droom van versoening en gelyke geleenthede vir almal is die nekslag toegedien met die uitsprake van die nuutverkose SR-president. Onverdraagsaamheid, haat, nyd, wanbegrip, rassisme en ʼn gebrek aan kennis was die ondertoon van Dwaba se toespraak en is ʼn aanduiding van wat die komende termyn gaan behels,” het Wessels Vrydag gesê.

Wessels het gesê dieselfde MT Steyn “wie se standbeeld glo vir sekere studente aanstoot gee” se visie was juis ʼn hoër onderwysinstelling in die Vrystaat, naamlik die UV, waar “hierdie einste studente nou die voorreg tot hoër onderrig geniet”.

“Dwaba, as ʼn studenteleier, behoort van beter te weet. Hy behoort homself ten minste van die feite te vergewis alvorens hy opruiende, ondeurdagte en onverdraagsame uitsprake maak. Sy swak leierskap voorspel niks goeds vir die SR se termyn nie.”

Sy het gesê die openbare deelnameproses wat met betrekking tot die toekoms van die standbeeld op die kampus van stapel gestuur is, word deur hierdie kwaadwillige uitsprake ondermyn.

“Studente wat mondelinge voorleggings gedoen het, was hoofsaaklik ten gunste van die behoud van die standbeeld. Hierdie voorleggings moet in ag geneem word en nie die betogende studente buite die lokaal nie, omdat hulle nie aan die diskoers deelgeneem het nie.”

Wessels het gesê Suid-Afrikaners moet kennis neem van die verkiesing in die kleine op die UV-kampus. “Die EFF stel onverdraagsaamheid en rassisme ten toon oral waar hulle betrokke is. Sulke rassehaat mag nie geduld word nie. Kiesers en spesifiek die stemgeregtigde jeug mag nie toelaat dat beide hul geskiedenis én toekoms onteien word nie.”

Sy het gesê alle studente behoort ewe welkom te voel op die kampus. “Almal se geskiedenis is belangrik en behoort bewaar te word. Standbeelde moet bygevoeg word, nie weggeneem word omdat ʼn kultuur van haat en onverdraagsaamheid deur leierskap gekweek word nie,” het Wessels bygevoeg.

“Die VF Plus sal met die rektor van die UV vergader ten einde die onverdraagsaamheid van die huidige studente-leierskap aan te spreek.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

74 Kommentare

jongste oudste gewildste
Anti-EFF

Ons weet mos nou die EFF is die eintlike rassiste in hierdie land van ons. Word net weer ‘n keer bewys.

AmY

Gaan hy nou aangekla word oor sy openlike haat teenoor blankes?

Of is die hele spul nou onaantasbaar?

Wou sou gebeur het as ‘n blanke sulke dinge teenoor hulle kwyt geraak het?

Hy sou dan verseker al geskors gewees het.

Johann cb

Mnr Dwaba, ons is wit, só geskape en dit gaan nié verander nie! Aanvaar ons vir wie ons is en hou asseblief op diskrimineer! Moenie alle wittes oor dieselfde kam skeer nie asseblief! Net ‘n baie klein persentasie is rassiste! Kom ons leef in vrede saam!

Jan

Geen regdenkende mens kan iets goed van hierdie situasie sê nie. Hopelose situasie

ferdi

Dit is in elkgeval nou swart Universiteit vat ons geskiedenis weg daar