Sukkelende staatsdiens ‘maak NGV onmoontlik’

Die DA se woordvoerder oor staatsdiens en administrasie, Leon Schreiber.

Die DA sê die ineenstorting van die staatsdiens se vermoë om selfs basiese funksies te verrig, vererger ál vinniger. Die amptelike opposisie het twee maande gelede gesê die nasionale en provinsiale regerings het sakeondernemings teen Maart vanjaar ʼn gesamentlike R7,1 miljard geskuld.

Drie maande later het provinsiale regerings nóg R4,3 miljard in skuld opgestapel wat hy versuim het om aan Suid-Afrika se hardwerkende sakelui en werkers te betaal.

“Die enigste uitsondering betreffende dié algehele verval is die DA-beheerde Wes-Kaap, wat net verantwoordelik is vir 0,01% van uitstaande skuld. Omdat die DA ʼn florerende private sektor beskou as die sleutel tot groei en vooruitgang, maak ons seker dat ons verskaffers betyds betaal,” het Leon Schreiber, die DA se woordvoerder oor staatsdiens en administrasie, Vrydag in ʼn verklaring gesê.

“In teenstelling lyk dit of die ANC sy bes doen om die private sektor te laat sneuwel. ANC-beheerde provinsies soos Gauteng en die Oos-Kaap weier om die onderskeidelik R1,5 miljard en R1,8 miljard skuld wat hulle in net drie maande aangegaan het, te betaal. Dít is benewens die miljarde wat hulle steeds teen die einde van die afgelope boekjaar geskuld het.”

Schreiber het gesê gegewe die ANC se plan om private gesondheidsorg uit te faseer ten gunste van die Nasionale Gesondheidsversekering (NGV), is dit uiters kommerwekkend dat die gesondheidsdepartement in sewe van die agt sukkelende provinsies die grootste sondaar is.

Teen Maart vanjaar het provinsiale gesondheidsdepartemente R5,8 miljard in onbetaalde skuld – ouer as 30 dae – gehad. Drie maande later het dit met nóg R3,7 miljard toegeneem.

“Dit is ʼn duidelike bewys dat die staatsdiens nie naastenby in staat is om die NGV-fonds, wat sowat R256 miljard gaan beloop – te bedryf nie. Die regering kan nie eens verseker dat die bestaande gesondheidsektor verskaffers en kontrakteurs betyds betaal nie. Tóg wil hy hê Suid-Afrikaners moet hul lewe in die hande plaas van dieselfde onbevoegde en korrupte kaders wat nie eens ʼn faktuur kan verwerk nie.”

Die DA het dus sy beroep op die ANC dat die NGV geskrap word, herhaal. Die DA sê sy plan vir universele gesondheidsorg is gratis, maar sonder om menselewens in die hande van sogenaamde kaders te plaas.

“Pleks van die NGV-fantasieë moet die regering die basiese dinge begin regkry deur ʼn vaardige staat te skep met geleenthede vir mense om te floreer. Ons kan dit net doen deur kaderontplooiing te skrap, aanstellings op grond van vaardighede en meriete te doen, en die staatsdienskommissie veel meer mag te gee om op te tree teen dié amptenare wat die lewe uit ons ekonomie suig,” het Schreiber gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Johanna Botha

NGV n flop nog voir dit begin ! DAAR IS NIE GELD NIE ! Omdat anc alles in die grond in ry met wat hy se ! Maar hulle vang dit nogsteeds nie !

Hagar

Die skrif aan die muur is net te duidelik. Daar is vir die regering geen manier om uit hierdie donker put te kom nie. Die inkomste moet nou dubbel soveel gegenereer word, om te handhaaf en om sy skuld te verhaal. Verder sou dit vereis dat salarisse drasties ingekort moet word wat vir die kaders onaanvaarbaar sal wees, en sal as rede dien om die regering te sink. Verder sal dit vereis dat diefstal roof en korrupsie onmiddellik sal staak, en dit is die onmoontlike.

JohanR

Die ANC luister na NIEMAND se raad nie. Hulle is ALTYD reg, al is hulle op daai oomblik verkeerd, of word in tien jaar verkeerd bewys nadat alles vernietig is. Pretensieus en onkundig is die beste manier om die ANC te beskryf.

Riaan

Grootbek is stil oor al die probleme in Pta wat da beheer is. Slegte spul …… het in vier maande nie my meters gelees of my eie lesings vasgele nie. Dit beteken ek sit met ‘n geskatte rekening van R 28 000 wat voor en na die verhoging “cover” en niemand insluitende Burgemeester, lid van burgemeester komitee en GCFO gee hel om nie!!!

Leon S

ANC kommuniste se strategie om alles te vernietig en dan van die staat afhanklik te raak vir aalmoese . Nuttelose spil …..