Sunette Bridges-haatspraaksaak in gelykheidshof aangehoor

Sunette Bridges. Foto: Facebook

Die sanger Sunette Bridges moet aan die hof verduidelik of sy bewus was van beweerde aanstootlike en haatlike opmerkings op haar Facebook-blaaie, het die gelykheidshof in Kaapstad Dinsdag gehoor.

Bridges was nie Dinsdag self in die hof nie, aangesien die hof nie argumente in die saak aangehoor het nie, maar eers wou besluit hoe die verrigtinge gaan voortaan.

Anton Katz, vir die Menseregtekommissie (MRK) wat Bridges daarvan beskuldig dat sy kommentaar op haar Facebook-blaaie toelaat wat op haatspraak neerkom, het gesê die hof moet aandui of dit die jurisdiksie het om die saak aan te hoor en of Bridges aanspreeklik gehou kan word vir derde partye se kommentaar wat voorkom op haar Facebook-blaaie, wat blyk of dit aan haar behoort.

Die MRK beskuldig Bridges daarvan dat sy kommentaar op die blaaie toelaat wat op haatspraak neerkom ingevolge die Wet op Bevordering van Gelykheid en die Wet op Voorkoming van Onbillike Diskriminasie van 2000. Die MRK voel die kommentaar skep ʼn omgewing waar rassistiese en haatlike optrede floreer.

Volgens Katz, het sy twee Facebook-blaaie, een onder haar eie naam en een getiteld Sunette Bridges News Page.

Paul Kruger, Bridges se prokureur, het aangevoer dat ʼn persoon nie aanspreeklik gehou kan word vir derde partye se kommentaar op die internet nie. “Wat sy in haar hofdokumente sê, is dat sy enige aanspreeklikheid daarvoor ontken en dat sy haar saak in die hof sal stel,” het hy aan regter Siraj Desai gesê.

Kruger het gesê ʼn mens kan nie net aanvaar dat sy kliënt die skepper en moderator is van ʼn aantal Facebook-blaaie onder haar naam nie.

Hy het gesê sy kliënt sal ook aanvoer dat sy nooit sekere opmerkings op haar blaaie gesien het nie, en dat sy dit ook nie al om die uur kan modereer nie.

Kruger het saamgestem dat sekere opmerkings rassisties en beledigend was. Hy het gesê Bridges verwyder gereeld sulke kommentaar, maar dat dit onmoontlik is om van alles bewus te wees.

Hy het verder aangevoer dat die Wes-Kaapse hof nie uitsluitlike jurisdiksie het nie en dat sy kliënt in Pretoria bly.

Bridges het na die hofverrigtinge op die Sunette Bridges News Page gesê die eerste dag van die verhoor is binne twee ure afgehandel. Sy het gesê sy is ongelooflik dankbaar dat die hof, op aandrang van haar prokureur, die volgende beslis het dat:

– daar kennergetuienis in die saak gelewer moet word oor hoe Facebook werk;

– alle aanklagte wat skriftelik teen haar ingedien is, bewys moet word en getoets moet word deur getuies te roep;

– sy self mag getuig in die saak; en

– die saak nie, soos versoek deur die MRK, slegs op papier gevoer kan word nie.

Sy berus haar by die beslissing van die hof dat Desai self die saak in Kaapstad wil aanhoor.

“Ek word nou uiteindelik die kans gegun om dit wat ek op die hart het, in ʼn hof te gaan getuig ná jare van beskuldigings wat na my geslinger word sonder dat ek ooit die geleentheid of die platform gegun was om myself te verdedig,” het sy gesê.

Die verhoordatum is geskeduleer vir 20 April in Kaapstad.