SuperSport-voorval: Uitkoms van ondersoek bekend

Ashwin Willemse. Foto: SuperSport

SuperSport het Dinsdag die verslag wat opgestel is ná die voorval waartydens Ashwin Willemse tydens ʼn regstreekse uitsending uit ʼn ateljee gestap het, bekend gemaak.

Gideon Khobane, uitvoerende hoof van SuperSport, het gesê adv. Vincent Maleka SC het Maandag sy verslag oor die gebeure ingehandig. Volgens Khobane het Willemse “ongelukkig” besluit om nie deel te wees van die ondersoek nie.

Hy het gesê die hersiening het bevind daar was geen rassistiese optrede deur Naas Botha en Nick Mallett nie. Volgens Khobane was daar geen geheime of openlike rassisme wat tot die voorval gelei het nie.

Hy het verduidelik die ondersoek het bevind daar was twee faktore wat ʼn logiese verduideliking vir die voorval bied. Die eerste faktor was die tegniese fout wat tot gevolg gehad het dat al die kommentators nie ʼn spreekbeurt gekry het nie en die tweede een dat Willemse Botha en Mallett as neerhalend beskou het toe hulle aangedring het hy moet eerste praat.

Volgens Calvo Mawela, uitvoerende hoof van MultiChoice, het Willemse gesê hy het besluit om nie aan die ondersoek deel te neem nie, aangesien hy meen dit nie die regte forum is om sy griewe te lig nie. Khobane het gesê SuperSport sal egter uitreik na Willemse.

Dit is intussen ook bekend gemaak dat Botha en Mallett nie die naweek in SuperSport se ateljee sal wees nie, aangesien die skedules reeds gefinaliseer is. Dit is ook bevestig dat daar steeds ʼn kontrak tussen SuperSport en Willemse is.

SuperSport sal intussen ook aanbevelings van die verslag implementeer. Dit sluit in ʼn forum vir die span ontleders om hul mening te lug ná afloop van ʼn uitsending en ʼn gedragskode vir ontleders insluitend griefprosedures. Daar sal ook berading aan al die ontleders verskaf word.

‘n Skermskoot uit die video van die voorval toe Ashwin Willemse tydens ‘n regstreekse uitsending van die Supersport-stel af gestap het.

Willemse het op 19 Mei ná die wedstryd tussen die Leeus en die Brumbies uit die SuperSport-ateljee gestap. “Jy weet wat, ek speel al lank hierdie sportsoort, nes almal van ons hier. Ek, as speler, is vir ʼn lang tydperk as kwotaspeler bestempel,” het hy tydens die regstreekse uitsending gesê. “Ek het hard gewerk om my eie respek in dié spel te verdien, ek gaan nie verkleineer word deur twee enkelinge wat in apartheid, ʼn gesegregeerde era, gespeel het en my wil kom ondermyn nie. Ek dink ek het nou genoeg gehad, ek kan nie met mense werk wat ander ondermyn nie.”

Willemse het daarna na Mallett en Botha gestap en gesê: “Julle kan maar daar sit en lag,” waarop Mallett geantwoord het: “Ek lag nie daaroor nie.”

“Julle weet presies wat gebeur het, dis reg so, ek gee nie om om verspot te wees nie. Ek is bly dit gebeur op regstreekse televisie sodat mense kan sien, julle twee sit hier – nee dis reg [sic],” het Willemse gesê en van die stel af gestap.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

125 Kommentare

jongste oudste gewildste
Jan

As rassisme ‘n kriminele oortreding is, moet die gebruik van die rasse kaart (sonder rede) dan nie ook strafbaar wees nie?

Daan Erasmus

As Naas en Nick besluit het om “ongelukkig” nie te getuig nie, is hul voor die bus gegooi. Dan was die uitkoms baie anders.

Se Maar Net

Niemand het gese dat jy n kwotaspeler is nie jy het dit gese

Spike

Hy wou nie deelneem omdat hy skaam is oor sy kinderagtige optrede. Wat van die vernedering aan Naas en Nic deur willemse, min. van sport en almal wat gal gebraak het. As hulle enige integriteit gehad het sou hulle volwasse genoeg gewees het en omverskoning gevra het, maar hul sal nie. SuperSport wees gewaarsku as willemse weer op die lug is sal julle leegloop van intekenare.

White Rhino

Stem saam Jan!!
Vals beskuldigings van vele.
‘n Ondersoek was onnodig – ons almal weet wat gebeur het – die mannetjie het nie sy werk gedoen nie en ander mense van rassisme beskuldig omdat hyself nie sy werk gedoen het nie.
Hoe belaglik. Hy het so homself in die voet geskiet.