Swaar vonnisse oor BTW-bedrog van meer as R200 miljoen

Argieffoto (Foto: Steve Buissinne / Pixabay)

ʼn BTW-bedrogsindikaat is in die Johannesburgse hooggeregshof ‘n kumulatiewe 205 jaar tronkstraf opgelê op 391 aanklagte wat wissel van bedrog, vervalsing en uitgifte, korrupsie, en geldwassery.

Jeremiah Musiwacho Dube is tot effektiewe tronkstraf van 65 jaar gevonnis. Rebecca Dube is 25 jaar tronkstraf opgelê. Maxwell Ndlovu-Mavudzi is 65 jaar tronkstraf, Constance Ramone 10 jaar tronkstraf, Edward Shoniwa 15 jaar tronkstraf, Audrey Radebe vyf jaar tronkstraf, Bongani Mbonani vyf jaar tronkstraf en Sello Rathete 15 jaar tronkstraf opgelê.

Phindi Mjonondwane, woordvoerder van die Nasionale Vervolgingsgesag, sê die groep is saam met Adam Phiri en Daniel Khanyile aangekla, wat staatsgetuies geword het.

Christopher Dube het gevlug nadat hulle skuldig bevind is toe sy borgtog verleng is, en die owerhede gaan voort met hul soektog om hom aan te keer.

Mjonondwane sê vanaf 2009 tot die tyd van hul inhegtenisneming in 2015, het die beskuldigdes ‘n BTW-bedrogsindikaat bedryf. Die modus operandi was om die Suid-Afrikaanse Inkomstediens (SAID) te bedrieg deur vervalste Belasting op Toegevoegde Waarde (BTW)-terugbetalings te eis.

Aan die hoof van die sindikaat (die “Kingpins”) was Jeremiah Dube en Maxwell Mavudzi, Zimbabwiese burgers wat op ʼn bedrieglike wyse Suid-Afrikaanse burgerskap verkry het, Sello Rathete en ene Boaz Chilala, ʼn Zambiese burger wat inhegtenisnemings ontduik het en steeds op vrye voet is.

“Die sindikaat het die SAID bedrieg deur BTW-opgawes in te dien. Volgens die BTW-opgawes is entiteite glo in hul name en/of die name van hul medebeskuldigdes geregistreer. Volgens die opgawes is BTW-uitgawes aangegaan toe meer as R100 miljard se diesel by plaaslike verskaffers aangekoop is of ingevoer is. Die diesel is by stoorgeriewe, wat aan Sasol Oil en Vopak behoort, gestoor. Die stoorkoste het BTW teen 14% ingesluit.”

Daarbenewens is die ingevoerde diesel aan oliereuse, insluitend Engen, Imperial Bulk Services, FPS en Unitrans verkoop teen ʼn nulkoers BTW. Die persone was dus geregtig om die BTW-uitgawes, wat hulle glo in stoorkoste aangegaan het, terug te eis.

“Fakture, wat só vervals is asof dit deur Sasol en/of Vopak uitgereik is, sowel as stoorooreenkomste, is by die SAID ingedien ter ondersteuning van die bedrieglike eise vir BTW-terugbetalings.”

Die vervolgingspan, onder leiding van adv. Skhumbuzo Majola, ʼn adjunkdirekteur van openbare vervolging en senior staatsadvokaat Moeketsi Sereme, het ‘n sterk saak teen alle beskuldigdes aan die hof voorgehou. ʼn Gemeenskaplike doel tussen al die beskuldigdes om die SAID te bedrieg is in die hof bewys.

“Ten tyde van hul inhegtenisneming het die BTW-sindikaat ʼn bedrag van meer as R200 miljoen rand van die SAID geëis, waarvan R100 miljoen uitbetaal is en verlore gegaan het aan die fiskus. Daar is bepaal dat alle besigheidsentiteite wat deur die sindikaat gebruik is om hierdie bedrog teen SAID te pleeg, dormant was en hoegenaamd nie betrokke was in enige aktiewe handeldryf nie, alhoewel dit as BTW-verkopers by die SAID geregistreer is.”

Mjonondwane  sê die SAID het ‘n anonieme wenk ontvang wat hulle ingelig het oor die verdagte aktiwiteite wat deur die beskuldigdes uitgevoer is.

Die SAID se kriminele ondersoekers het uitgewys dat die wenk die ondersoekspan baie gehelp het in die nasporing van alle betrokke entiteite en die vloei van fondse in die banke om die raaisel te ontrafel.

Terwyl die ondersoek aan die gang was, het die beskuldigdes probeer om ʼn senior amptenaar van die SAID, wat die ondersoek uitgevoer het, om te koop.

“Die beskuldigdes het die sogenaamde Stalingrad-strategie aangeneem wat die verhoor vir agt jaar lank vertraag het. Hulle het tussentydse aansoeke en appèlle by die hoogste hof van appèl en die Konstitusionele Hof ingedien in ʼn poging om geregtigheid te ontduik, maar hulle het klaaglik misluk.”

Tydens die vonnisoplegging het die duo van advokate gepleit vir die oplegging van ‘n vonnis wat gelykstaande is aan die erns van die misdade wat deur alle beskuldigdes gepleeg is, in ag genome dat dit die fiskus was wat aan die ontvangkant van die sindikaat was.

Die direkteur van openbare vervolging, adv. Andrew Chauke, het die uitspraak verwelkom, aangesien die gevolge van die sindikaat ver buite monetêre verlies strek. Chauke meen dit ondermyn die integriteit van instellings soos die SAID ondermyn en beïnvloed dienslewering nadelig, aangesien die geld gegenereer deur die SAID ‘n verskil maak in die verbetering van die lewensgehalte van gewone Suid-Afrikaanse burgers.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

7 Kommentare

Elizabeth ·

Sjoe, dink net die lewe wat die fat cats geleef het. Moet lekker wees? Hulle hetcso lank daarmee weggekom. Moes ñ fees gewees het. Bye bye birdies.

Lettie ·

Maak nes iemand anders …wat 20 jaar dieselfde manier gebruik. Nou tyd ….

Tielman Nieuwoudt ·

Hoekom het SAID solank gevat om dit agter te kom? BEE reels?

SjN ·

Weereens buitelanders betrokke, daar moet interne hulp en samewerking binne die Said wees, Sars oudit my elke jaar sowel as navrae tov btw transaksies en dit vir n paar rand, hoe kry hulle dit reg?

Dries ·

Onwettige buitelanders op borg vrygelaat?? n Klein brein sal besef dat hulle sal verdwyn.
Soos ek op n vorige berig gesê het, sodra ek R200 BTW terugeis, wil SARS eers alle dokumentasie van my hê. Hierdie tipe bedrog is van binnekringe.

Aggie ·

SARS is net so aanspreeklik hier omdat hy nie diepgaande ondersoeke doen ten opsigte van buitelanders se eise nie. Dit is steeds verstommend dat borgtog so maklik toegestaan word. Hierdie kriminele is almal vlugrisikos.

Renier ·

9 jaar om die saak klaar te maak? Ek dink sekere regslui is ook skuldig aan vertraging.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.