‘Swartgesig’-herrie: Twee Maties geskors

Foto: Twitter

Foto: Twitter

Twee studente van die Universiteit Stellenbosch is geskors ná ʼn foto van hulle op sosiale media gedeel is waar hulle met donkergeverfde gesigte poseer.

Maroela Media het Vrydag berig die foto van die twee studente van Heemstede-dameskoshuis het opslae gemaak.

“Die twee studente is geskors hangende die uitslag van ʼn ondersoek,” het die universiteit in ʼn verklaring gesê. “Een van die studente is ook van haar pligte as ʼn studentementor onthef.”

Die foto is glo geneem tydens ʼn verwelkomingsgeleentheid in die koshuis. Een van die studente het Vrydagmiddag in ʼn verskoning gesê hul lywe was donkerpers geverf en hulle sou met blinkers bedek word as deel van die sterreruimpartytjie van die koshuis.

ʼn Saak is by die gelykheidseenheid van die universiteit geregistreer. Die gelykheidseenheid is op die been gebring om alle voorvalle van diskriminasie en seksuele teistering te hanteer.

“Die bestuur het Saterdag in ʼn brief aan die studentegemeenskap bevestig dat al die ondersoekbeamptes wat by die dissiplinêre proses betrokke is, verteenwoordigend sal wees in terme van ras en geslag,” lui die verklaring. “Werkswinkels, gefasiliteerde gesprekke en gespreksirkels het oor die naweek in koshuise plaasgevind, as ʼn voertuig om bewusmaking en begrip te skep.”

Die bestuur het Sondag sy dankbaarheid en waardering uitgespreek dat daar vinnig en behoorlik opgetree is deur die personeel van die Eenheid vir Studentesake, koshuishoofde, studenteleiers, fasiliteerders en studente.

“Die universiteit veroordeel alle vorme van rassisme en diskriminasie en erken die ernstige negatiewe impak van die pyn en trauma wat studente, personeel en lede van die publiek ervaar het.”

Volgens die verklaring beskou die universiteit die voorval in ʼn baie ernstige lig weens ʼn soortgelyke voorval in 2014, asook nasionale berigte van rassisme in die land.

Studente het Vrydagaand hul woede, ontevredenheid en pyn uitgespreek oor die voorval tydens ʼn vergadering wat in Heemstede gehou is. ʼn Groot groep studente, die Verteenwoordigende Studenteraad, koshuiskomitee, Heemstede-inwoners en personeel van die universiteit, insluitend prof. Nico Koopman, waarnemende viserektor: sosiale impak, transformasie en personeel; en prof Arnold Schoonwinkel, viserektor: leer en opleiding. Sommige van die gesprekke het tot in die nag voortgeduur.

Die regsfakulteit het Vrydag in ʼn kort verklaring gesê hy neem met kommer kennis van die beweerde betrokkenheid van ʼn regstudent in ʼn “swartgesig-voorval” op die kampus. “Die betrokke universiteitstrukture is tans besig om die saak te ondersoek. Die fakulteit sal ʼn verdere verklaring uitreik sodra die nodige inligting bekom is.”

Die universiteit moedig alle studente wat deur die betrokke voorval geraak is en ondersteuning benodig, om die vertroulikheidskrisissentrum te skakel by 082 557 0880.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

176 Kommentare

jongste oudste gewildste
Jaco

BELAGLIK !!!!!!!!!!

Nommer 1

Baie sad toedrag van sake.

Tinus

Dit het nou uiters spitsvondig van die univerisityd geword en regtig te ver ge vat.

Melissa

Dit is wraggies so erg belaglik ek het nie eers woorde nie….

Anneliese

Totaal belaglik….