Swerm bye pak inkopiegangers

‘n Baadjie met angels op. Foto: Verskaf.

Talle mense is laat Donderdagmiddag deur ʼn swerm bye gepak by ʼn winkelsentrum in Weststraat in Pretoria.

Nick Dollman, woordvoerder van Netcare 911, het gesê die voorval het omstreeks 15:50 plaasgevind toe ʼn groot tak van een van die nabygeleë bome met ʼn elektriese saag verwyder is.

“Voor ons by die toneel opgedaag het, was dit blykbaar chaoties. Mense het glo rondgehardloop, sommiges is weggesleep van die swerm en ander het die swerm bye met ʼn brandblusser bygedam,” het Dollman verduidelik.

Paramedici het nagenoeg tien mense ondersoek, wat twee vroue insluit wat uit hul kar geklim het om ʼn bejaarde vrou – op wie die bye in daardie stadium toegesak het – te help.

“Al dié pasiënte was in ʼn stabiele toestand en het verdere mediese behandeling geweier.”

ʼn Seun (11) is egter allergies vir bysteke en was nie so gelukkig nie. “Hy is verskeie kere gesteek en het dringend behandeling nodig gehad. Hulle het hom ver van die bye af behandel en sowat 13 angels uit sy kop en nek verwyder. Hy is na ʼn hospitaal gehaas vir verdere mediese behandeling.”

Sy toestand was glo ernstig maar stabiel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Ronell ·

Ai toggie, wat n pynlike situasie vir almal. Die bye is verward en gaan op die aanval uit en mensekinders is in hul visier. Jammer vir al die mense wat gesteek is, en ook jammer vir die bye want hulle lewer so n belangrike taak in ons ekologie

Byeboer ·

Mense moet meer versigtig wees met bye hierdie tyd van die jaar. Enige swerm bye sal nou aggressief wees omdat hulle die voorraad heuning wat hulle opgebou het moet beskerm want dit is hulle kos om deur die wintermaande te kom.

SARIE VAN HEERDEN ·

Byeboer, dankie vir jou kommentaar. Meeste van die tyd is die kommentaar van lesers uiters pateties totdat ‘n kundige persoon kom met sy nuttige kommentaar. Dankie Byeboer.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.