Taakmag slaan glo toe by gesinshuis in soektog na Neline

Neil de Lange se huis se voordeur wat oopgebreek is. Foto: Verskaf.

Neil de Lange se huis se voordeur wat oopgebreek is. Foto: Verskaf.

ʼn Gesin van Middelburg in Mpumalanga is erg getraumatiseerd nadat die polisie se taakmag glo vandeesweek op hul huis toegeslaan het, vermoedelik as deel van hul soektog na Neline van Zyl (13), wat toe nog vermis was.

Neil de Lange (39), ʼn verkoopsverteenwoordiger in die mynboubedryf, het Vrydag aan Maroela Media gesê hy was Woensdag omstreeks 05:30 besig om te skeer toe ʼn groep van tussen 10 en 15 beweerde taakmaglede hul huis in Kanonkop bestorm en sy voorhek en voordeur oopgebreek het.

Sy vrou, Lizel (39), was buite by die agterdeur besig om wasgoed op te hang en sy twee seuns, onderskeidelik 11 en 14 jaar oud, was nog in hul slaapkamers voordat hulle 06:00 sou opstaan om vir skool gereed te maak.

Die voorhek is ook oopgebreek.

Die voorhek is ook oopgebreek.

“Ons twee Jack Russels het erg begin blaf en ek het ʼn groot rumoer gehoor,” het De Lange gesê. “Ek het aanvanklik gedink ons word deur rowers oorval. Ek het gaan ondersoek instel en is in die gang deur van die lede aangekeer. Hulle was swaar gewapen en het klapmusse en kamoefleerdrag aangehad,” het De Lange gesê.

Hy het gesê die beamptes het hom gedwing om op die vloer te lê, sonder om te verduidelik wat hulle in die huis doen.

Intussen het van die beamptes Lizel in die kombuis in gedwing. Die gesin is elkeen afsonderlik aangehou terwyl die groep die huis vermoedelik vir leidrade deursoek het. Hul soektog het glo niks opgelewer nie.

De Lange en sy gesin is ʼn ruk later na buite geneem waar ʼn kolonel glo aan hom gesê het die polisie ondersoek Neline se ontvoering.

Neline se vermistepersone-saak is vroeg Woensdag van ʼn vermistepersone-saak na ʼn saak van ontvoering verander. Sy is later die middag by ʼn gastehuis in die Loskopdam-omgewing opgespoor.

“Buiten dat ons erg getraumatiseerd is en skade aan ons eiendom opgedoen het, het ons steeds nie ʼn benul hoekom die taakmag juis op ons huis toegeslaan het nie,” het De Lange gesê. “Ons het geensins bande met die meisie of haar gesin nie. Ons kinders is nie eens in dieselfde skool nie. Hoekom ons?”

Hy het gesê pogings om dié vraag by die polisie beantwoord te kry was vrugteloos.

“Toe ek navraag doen oor die skade aan my eiendom, het die kolonel wat by my huis was, gesê ek moet ʼn siviele eis indien.”

De Lange se bure het hom Woensdag gehelp om sy deur toe te kap en die deur is Vrydagoggend met ʼn nuwe een vervang. Sy seuns moes ook berading by ʼn sielkundige ontvang en is aangesê om vir opvolgsessies te gaan.

Hy het intussen regshulp ingewin, die voorval by die polisie aangemeld en ʼn saaknommer gekry. “Ek raadpleeg my prokureur volgende week om die pad vorentoe te bespreek.”

Gerugte doen die ronde dat die polisie sedert Neline se verdwyning verlede Donderdag by tussen 30 en 35 huise opgedaag het om leidrade op te volg, maar dat daar nie só drasties opgetree is nie.

Kapt. Khanyisile Zwane, woordvoerder van die Middelburg-polisie, het Vrydag aan Maroela Media gesê sy is nie by magte om namens die taakspan kommentaar te lewer nie.

Maroela Media het navraag by die provinsiale polisie gedoen en wag nog vir terugvoer.

Intussen verskyn die 17-jarige seun wat op ʼn aanklag van ontvoering in hegtenis geneem is nadat Neline gevind is, Vrydag in die dorp se landdroshof.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Peet Schabort

Dan wonder Zuma dat die publiek in opstand kom teen die SAP”DIENS”. DIENS se blerrie voet !!!
Nou gaan my deur ook seker afgebreek word . . .

Francois le Cochon

Kon hulle nie net maar die huis omsingel, en die klokkie gelui het nie? Mense met ‘n lae selfbeeld en minderwaardige kompleks, is baie gevaarlik indien hulle in ‘n magsposissie geplaas word. Dit is soos iemand wat ‘n leeu skiet, en dan glimlaggend saam met die dooie leeu afgeneem word – ‘n hero se ego word gestreel.

Oom Okkert

Iewers is ‘n slang in die gras of iets in die water en dit stink beslis?

Gerhard

‘n Dag is ‘n dag dan gaan daardie spannetjie hulle lywe rondgooi by die verkeerde ou se huis en lelik bloedneus kry.

SNEL

Skokkend dat mense so hanteer word sonder enige rede of selfs verduideliking.