Talle eis Abrahams se kop moet rol

Adv. Shaun Abrahams, die hoof van die Nasionale Vervolgingsgesag (NVG). Foto: Flickr/GovernmentZA

Adv. Shaun Abrahams, die hoof van die Nasionale Vervolgingsgesag (NVG). Foto: Flickr/GovernmentZA

Verskeie politieke partye en organisasies het Maandag geëis dat adv. Shaun Abrahams, hoof van die NVG, geskors moet word, hangende ʼn ondersoek na sy bevoegdheid vir sy amp.

Abrahams se aankondiging vroeër vandag, dat die aanklagte teen Pravin Gordhan, minister van finansies, laat vaar is, het opslae gemaak en wyd kritiek teenoor Abrahams en die NVG uitgelok. Verskeie partye het gesê Abrahams se skielike ommeswaai oor die saak is bewys daarvan dat die aanklagte teen Gordhan van die begin af polities gemotiveerd was.

Die Inkatha Vryheidsparty (IVP) het Maandag gesê ʼn kommissie van ondersoek moet op die been gebring word om Abrahams se bevoegdheid vir sy amp te ondersoek. Mkhuleko Hlengwa, die party se woordvoerder oor finansies, het gesê Abrahams se besluit om die aanklagte teen Gordhan te laat vaar, is bewys daarvan dat die besluit, om Gordhan te vervolg, polities gemotiveerd en kwaadwillig was.

Hy het gesê die besluit het die NVG se geloofwaardigheid ernstige skade berokken, wat nog verder vererger word deur politieke inmenging. “Hoewel mnr. Abrahams daarop geregtig is om ʼn besluit om iemand te vervolg te heroorweeg en sodanige aanklagte terug te trek, meen die IVP steeds dat [Abrahams] ʼn medepligtige was in die Valke se polities-gemotiveerde heksejag [teen Gordhan] en het hy sodoende ons reeds sukkelende ekonomie R60 miljard gekos toe hy besluit het om die minister aan te kla,” het Hlengwa gesê.

Die DA het op sy beurt ook ʼn ondersoek na Abrahams se bevoegdheid geëis en gesê Abrahams het bloot die aanklagte teen Gordhan laat vaar toe hy besef het hy het nie genoeg bewyse om sy “polities gemotiveerde vervolging” voort te sit nie.

“[Abrahams] kan nie nou doodeenvoudig sê ‘ons het ʼn fout gemaak’ en die aanklagte terugtrek nie. Daar is heeltemal te veel op die spel om sulke onaanvaarbare en onverantwoordelike foute te maak,” het Mmusi Maimane, die DA-leier, in ʼn verklaring gesê.

“Shaun Abrahams moet verantwoordelik gehou word vir hierdie onaanvaarbare fout. Ek doen daarom ʼn beroep op pres. Jacob Zuma om [Abrahams] onmiddellike te skors. Volgens artikel 12(6) van die NVG-wet, is die president by magte om die nasionale direkteur van vervolging voorlopig te skors hangende ʼn ondersoek na sy bevoegdheid om sy amp te beklee. Zuma moet nou beslissend optree, anders sal ons geen ander keuse hê as om te glo dat hy agter hierdie kwaadwillige politieke gedrag sit nie.”

Die South African National Civic Organisation (Sanco) het ook sy stem gevoeg by talle ander organisasies en gesê Abrahams se bevoegdheid en dié van die Valke-hoof, Berning Ntlemeza, moet ondersoek word. Jabu Mahlangu, Sanco se nasionale woordvoerder, het gesê daar hang nou, meer as ooit, ʼn wolk van sameswering oor beide die Valke en die NVG.

Dr. Pieter Mulder, die leier van die VF Plus, het gesê hoewel die besluit om die aanklagte teen Gordhan te laat vaar reg was, verander dit nie die feit dat die aangeleentheid die NVG en Abrahams in ongeloofwaardigheid gedompel het nie. “Dit was van meet af aan duidelik die saak teen Gordhan, Oupa Magashula en Ivan Pillay was nie gegrond op ware feite nie en adv. Abrahams sal moet bedank om die publiek weer vertroue in die NVG te gee,” het Mulder gesê.

Intussen het die ANC in reaksie op Abrahams se besluit gesê Zuma moet met Abrahams in praat om ʼn soortgelyk fiasko in die toekoms te verhoed. “Die ANC doen ʼn beroep op [Zuma] om met die NVG-leierskap te vergader om ʼn herhaling hiervan te voorkom en die onafhanklikheid en integriteit van die NVG te beskerm,” het die party in ʼn verklaring gesê.

“Soos vervat in die grondwetlike beginsel van onskuldig tot andersins bewys, het die ANC nog altyd in comrade Pravin Gordhan se onskuld geglo en hom daarom onwrikbaar ondersteun sedert die bedrogaanklagte teen hom ingedien is. Die besluit van die NVG om [Gordhan] en ander aan te kla, het ʼn negatiewe impak op die ekonomie gehad en onnodige bespiegeling oor die ware motief daaragter veroorsaak.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Johann

Net onlangs was daar n geanimeerde fliek genaamd SHAUN THE SHEEP…klink vir my ons kyk na opvolg?

humor

Die een saam met Abrahams agter hierdie komplot is weereens z. wat skotvry gaan kom. Afri Forum sal met sy ondersoek vining aan die gang kom want die nuwe ob is eenvoudig nie betroubaar nie. Vir hierdie ligte gebeurtenissie wat die land n miljard en meer kos, moet daar maar net in gesprek getree word wat in elkgeval n klugspel sal wees.

KP

Aag asseblief Zuma het die opdrag gegee om aan te kla, nou moet hy met Abrahams praat!!!!!!!
Abrahams moet by die balie verkla word en van die rol verwyder word. Hy is nie n advokaat se $#@ werd nie.

jacqui

Dis altyd so voorspelbaar. Word Abrahams ingeroep en oor die vingers getik deur jz, terwyl jz vir hom knipoog. Hoeveel maal het dit nou al gebeur met baie van die situasies ? Moeg daarvoor. Dink hulle miskien hulle flous die man op die straat ? Ai ai.

Jakes

NEE, nee nee! Geen skorsery met volle betaling. Hoeveel hooggeplaastes sit al JARE tuis, of siek of geskors? Vors daardie statistieke ASB na en lig ons belastingbetalers in. Geagte heer Abrahams kan afbetaal word weens so baie dinge teen hom. Maand salaris vir elke jaar diens, koebaai.