Talle kom na vore oor kaalfoto’s-dreigemente

'n Skermskoot van 'n gesprek tussen die verdagtes en een van die slagoffers.

‘n Skermskoot van ‘n gesprek tussen die verdagtes en een van die slagoffers.

Ongeveer 150 mense het die afgelope week na vore gekom met inligting in verband met ʼn slenter waarmee sosialemediagebruikers met naakfoto’s afgepers word om geld uit hulle te kry.

Marius Jacobs, stigter van die Watchdog Tzaneen-inisiatief wat die ondersoekspan bystaan in sy ondersoek, het aan Maroela Media gesê sedert daar ʼn beroep op die publiek gedoen is om na vore te kom met inligting, het talle mense al gebel en e-posse gestuur en gesê hulle het met dieselfde boosdoeners te doen gehad.

“Sommige mense het die geld aan die verdagtes betaal om te keer dat die foto’s op sosiale media gedeel word; ander het dit nie betaal nie. Die bedrae wat geëis word wissel van R1 000 tot R12 000. Sommige van die mense het sake by die polisie oopgemaak en ander het nie. Dit is nie nog nie duidelik presies hoeveel sake amptelik oopgemaak is en ondersoek word nie,” het Jacobs gesê.

Maroela Media het vroeër berig die verdagtes teiken mense op sosialemediaplatforms soos WhatsApp en dreig hulle om ʼn sekere bedrag aan die verdagte oor te betaal om te verhoed dat eksplisiete naakfoto’s, waarby die slagoffers persoonlik geïmpliseer word, op sosiale media gepubliseer word. Die SAPD, Valke en die teenmisdaadgroep SA Community Crime Watch (SACCW) is betrokke by die ondersoek na die saak.

Een van die slagoffers, wat op voorwaarde van anonimiteit met Maroela Media gepraat het, het gesê hy is deur ʼn aanlyn-kletskamer en later op WhatsApp op dieselfde manier geteiken. “Die verdagtes het hulself as ʼn mooi, jong meisie voorgedoen en met my begin gesels. Die sogenaamde ‘meisie’ het vir my uit die bloute begin boodskappe en foto’s stuur en enige man sal geprikkel wees as hulle sulke soort boodskappe kry,” het die man gesê.

“Ek het met die persoon begin gesels en ook foto’s vir die persoon gestuur, maar het redelik vinnig agtergekom daar was iets verdag aan die manier waarop die persoon Engels praat en die woorde wat gebruik word. Dit was nie lank voordat hulle my afgepers het nie en gesê het ek moet R1 500 aan hulle betaal anders sou hulle die foto’s op Facebook publiseer waar al my vriende en familie dit sou sien,” het hy gesê.

Die slagoffer vertel dat hy met behulp van ʼn kennis daarin kon slaag om die ligging van die verdagtes se selfoon op te spoor en nadat die verdagtes besef het hy is op hulle spoor, het hulle verdwyn.

“Ek het geen verskoning vir wat ek gedoen het nie en dit is wat gebeur as jy skelm geselsies aanknoop. Ek sal dit nooit weer in my lewe doen nie. Mense moet weet daar is baie skelms daar buite en jy moet nie sommer net enigiemand vertrou nie. Die beste is om seker te maak dat die veiligheidstellings op jou sosialemediaplatforms só gestel is dat niemand behalwe jou vriende jou persoonlike besonderhede kan sien nie.”

Jacobs het gesê hoewel hy nog nie kan bevestig of al die beweerde slagoffers deur dieselfde groep verdagtes geteiken is nie, glo hy wel dat baie van die sake met mekaar verband hou. “Mense moet na hul naaste polisiestasie gaan om ʼn saak oop te maak indien hulle op só ʼn manier geteiken word,” het hy gesê.

Mense met meer inligting kan Jacobs by 079 898 4539 of Steven King by 082 920 5799 bel, of andersins ʼn e-pos stuur na [email protected] Alle inligting sal streng vertroulik hanteer word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Kobus

As n persoon niks verkeerds gedoen het….dan daar mos nie vrese om afgepers te word…so moenie aan skelm geselsies meedoen en van jouself ekspliete foto’s op sosiale media deel…dit gaan jou suur bekom…die wat betaal was ook maar stout gewees…nou as die beursie oop gemaak moet word…nou praat die gewete skielik…

Anoniem

Stem Kobus…………………

Spook

HA HA HA !!!! Laat dit vir julle n les wees.

Tersia

Dit het my ook oorgekom ‘n paar jaar terug, maar ek was single en was nie besig met skelm geselsies nie….. Hy het ook fotos van sy geslagdele gestuur en gevra vir kaal fotos. Toe ek noem dat ek hom glad nie ken nie en dat en nie fotos gaan stuur nie het hy baie kwaad geword en my gevloek en genoem dat hy my gesig foto op naak lywe gaan sit en publiseer. Ek het gevra of hy asb vir my ‘n mooi lyf sal uitsoek want ek is bietjie oorgewig en dit lyk of die hael my geslaan… Lees meer »

Johann

Ou kan sekerlik ongewenste mense “blok” om die sulkes te laat verstaan jy neem nie deel aan die gesprekke nie