Talle personeel, leraars afgelê by NG Moreleta

Foto: Google streetview.

Die NG gemeente Moreletapark in Pretoria het talle van sy personeel afgelê.

Die kerk het met ʼn afleggingsproses begin waarvolgens 19 personeellede, onder wie drie leraars, afgelê word. Volgens Pieter Breytenbach, bedryfshoof en gemeentebestuurder, is die personeel op 1 Augustus van die herstrukturering in kennis gestel en die gemeente die daaropvolgende Sondag.

Die personeellede werk Oktober hul kennismaand. “Ons het na ons bedieningsmodel gaan kyk en dit aangepas. Ons het daarvolgens die afleggings gedoen. Dit is nie net sekere posvlakke wat deur dié afleggings geraak word nie,” het Breytenbach gesê.

Volgens Breytenbach het die kerk deurentyd oop kaarte gespeel met die personeel en is hulle heeltyd ingelig oor nuwe verwikkelinge. “Dit is nie net vir die mense wat afgelê word baie sleg nie, dit is vir dié wat agterbly ook baie sleg, ons het steeds met hulle kontak. Dis soos met enigiemand wat deur trauma gaan, daar is verskillende fases.”

ʼn Vergadering word luidens die kerk se webwerf direk ná die erediens gehou op 15 Oktober. Volgens Breytenbach sal die vergadering gebruik word om vrae van die gemeente te beantwoord en die pad vorentoe sowel as die nuwe bedieningsmodel te bespreek.

“Dit is vir ons belangrik om deursigtig en tydig met kommunikasie te bly. Verskeie prosesse maak deel uit van die herstruktureringsproses. Tans is die personeel- en leraarsposte gefinaliseer. Nie een leraar of personeellid is onaangeraak in hierdie tyd nie. Die proses van ons gemeente se eksterne vennote is in finale fase,” lui die verklaring op hul webwerf.

Die herstrukturering is volgens Breytenbach weens afnemende lidmaatskapgetalle en die algemene swak ekonomie. Volgens hom is daar tans tussen 7 000 en 8 000 aktiewe lidmate in die gemeente.

“Ons inkomste het oor die afgelope paar jaar gestabiliseer, maar dit raak ʼn probleem as jou inkomste stabiel bly maar jou uitgawes styg.”

Hy het ontken dat die Afrikaans is Groot-konserte, wat vir jare by die kerk gehou is en voortaan by die nuwe Time Square Arena by die Menlyn Maine-winkelsentrum aangebied word, enigiets met die afleggings te doen het. “Daar was nie ʼn winsmotief daarmee nie, dit was deel van dienslewering aan die gemeenskap.”

“As ons ʼn keuse gehad het, sou ons dit nooit gedoen het nie. Maar as jy in so ʼn situasie beland, moet jy dit hanteer,” het Breytenbach oor die afleggings gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

84 Kommentare

jongste oudste gewildste
Christa

Ja….en die wat nie geraak word deur die afleggings nie is seker die hoogsbetaalde personeel en leraars in die gemeente.
Die gemeente word ook seker soos soveel ander gemeentes ñ familie besigheid.

Anton Redelinghuys

Daardie aand kom sy dissipels na hom toe en sê: ‘Dit is al laat, en dit is ’n eensame plek. Stuur die mense weg sodat hulle vir hulle in die dorpies hier naby kos kan koop.’ ‘Hulle hoef nie te gaan nie’, antwoord Jesus. ‘Gee julle vir hulle iets om te eet.’ Jesus draai na Filippus toe en vra: ‘Waar kan ons genoeg kos koop om vir al hierdie mense kos te gee?’ ‘Dit sal vreeslik baie geld kos om genoeg te koop sodat elkeen net ’n bietjie kan kry’, antwoord Filippus. Andreʹas sê: ‘Hierdie seun, wat ons kos dra,… Lees meer »

Speedguard

Money,money ,money ,its a rich mans world!! Sterkte vir die wat afgele word, dit is werklik BAIE moeilik hier buite !! Pslm 102:7 !!

Eish

Die pompkamer van die NGK! Ek voel die verarming van ons volkie lankal aan, maar die mediadekking aan superluukse aftree-oorde, hoe om jou aftrede te bestuur artikels en super duur huise stroom uit die media asof niks fout is nie. Diè kraak bewys dat daar n hengse skroef los is. Die meerderheid kry swaar. Selfsug neem toe aangesien dit die paspoort tot oorlewing geraak het in die plek. Hawens van laaste hoop word al hoe dringender ten einde te oorleef met waardigheid. Dit, is ons uitdaging. My innige simpatie met diegene wat geraak gaan word deur die afleggings, maar die… Lees meer »

Skande

Ek het altyd met my fiets kerk toe gery en my kollekte betaal en toe op n Sondag more, wat skets my verbasing, die dominee kom aangery in n splinternuwe Merzedes Benz.
Die kerk het my nooit meer gesien nie aangesien alles in die kerk om geld draai en niks anders nie.