Talle sterf, meer as 1000 reeds vas vir geweld

‘n Vrou glimlag terwyl sy weghardloop van ‘n polisielid wat plunderaars in Katlehong probeer verjaag. (Foto: Phill Magakoe/AFP)

Die gesamentlike operasionele en intelligensiestruktuur (NatJoints) het bevestig dat altesame 1 234 mense in verband met gewelddadige onluste en plundery die afgelope paar dae in KwaZulu-Natal en Gauteng in hegtenis geneem is. Die plundertogte het nou reeds 72 lewens geëis.

Volgens kol. Brenda Muridili, NatJoints se woordvoerder, is daar ’n verhoogde polisieteenwoordigheid in veral gebiede wat deur geweld geteister word sedert die weermag ontplooi is en operasionele wetstoepassingspersoneel van verlof en rusdae teruggeroep is.

Sy sê voorts dat grootskaalse geweld wat sedert die naweek in dié provinsies ontvou het, nog nie na ander provinsies oorgespoel het nie.

Enkele gevalle van plundery en geweld is egter in Mpumalanga en die Noord-Kaap aangemeld, maar is volgens Muridili vinnig onder beheer gebring.

“Een persoon is in hegtenis geneem in verband met plundering en beskadiging van eiendom in Matsulu in Mpumalanga. Twee voorvalle is ook in die Galeshewe-informele nedersetting naby Kimberley aangemeld waar nóg ’n persoon in hegtenis geneem is.”

Muridili sê polisie in dié provinsies patrolleer deurlopend geïdentifiseerde gebiede wat moontlik geteiken kan word in ’n poging om moontlike opportunistiese kriminele aktiwiteite af te weer.

“Provinsiale polisiehoofde het intussen ook die polisie se sosiale misdaadvoorkomingstrategie geaktiveer en in gesprek getree met verskeie belanghebbendes in die gemeenskap, onder wie tradisionele leiers en die sakegemeenskap, om huidige operasionele planne te verskerp.”

Volgens Muridili word 27 sake tans in KwaZulu-Natal ondersoek, waarvan 14 moord- en 13 geregtelike doodsondersoeke is. In Gauteng word 19 moordsake ondersoek en is daar 26 geregtelike doodsondersoeke.

“Die meerderheid van die geregtelike doodsondersoeke hou verband met stormlope wat tydens die plundering van winkels en winkelsentrums plaasgevind het, terwyl ander sterftes en beserings met OTM-ontploffings en skietery verband hou.”

Die polisie, weermag en NatJoints het die aanvalle op wetstoepassingsbeamptes veroordeel wat onder meer tot die dood van Meshack Mahlangu (50), verbonde aan die EMPD, gelei het. Sewe ander wetstoepassingsbeamptes word tans in die hospitaal behandel.

Twee reservis-konstabels is intussen in Soweto aangekeer in verband met die besit van eiendom wat glo tydens plundery gesteel is. Hulle was ten tyde van die voorval aan diens.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
Samuel

Dit is goeie nuus dat misdadigers aangekeer is, maar hoelank sal dit duur totdat suksesvolle vervolging ingestel word? Jammer om te lees van reservis konstabels wat blykbaar ook by misdadigheid betrokke was.

Kokerboom

Die chaos/plundery kon verhoed wees as NI , Polisie , weermag en Kabinet gebeurlikheidsplanne in plek gehad het en pro aktief opgetree het!!!Die privaatsektor dws die wat skade gely het moet ‘n massiew klasaksie teen regering met dringendheid instel. Iemand moet aanspreeklikheid aanvaar en dis die ANC

Mariana

Arrestasies goed, maar daar is nog duisende wat amok maak. Die aanhitsers moet ook aangekeer word. Dit is hulle wat die spul aan die gang hou.

gehasie

ANC mededaders en medeplig … intelligensie was beskikbaar …. bloot net onbeholpe kom erg onder verdenking.

Sambok

Daar is n slang in die gras-die rooipette is te stil na my sin-undercover?