Talle vrae ná bekende diereliefhebber se ‘selfdood’

Annel Snyman (38) saam met een van haar geliefde leeus. (Foto: Facebook)

Honderde boodskappe van medelye het ingestroom ná die dood van Annel Snyman (38), eienaar van die Loebies-roofdierpark buite Bela-Bela (Warmbad) in Limpopo.

Snyman is beskryf as ʼn vrou met ʼn ongelooflike liefde vir diere en iemand wat altyd goedgesind teenoor mens én dier was.

Vir Snyman se familie is die verlies enorm, maar daar is ook meer vrae as antwoorde ná haar dood laat Maandagaand.

Snyman was saam met ʼn vriend by die Cayley Mountain Resort in KwaZulu-Natal vir ʼn wegbreekkans, toe haar vriend haar liggaam glo Maandag omstreeks 22:30 in die badkamer ontdek het. Snyman het haarself oënskynlik om die lewe gebring deur haar met ʼn rekverband agter die deur op te hang.

Antoinette Snyman, Annel se ma, het gesê die vriend het hulle Dinsdagoggend vroeg van haar vermeende selfmoord in kennis gestel, nadat die polisie kort ná middernag al na die toneel ontbied is.

Antoinette het gesê Annel het wél lupus gehad, maar dat sy nie ʼn depressielyer was of enige selfmoordneigings gehad het nie. “Wát gebeur het, weet ek nie. Ek wéét nie. Dis ʼn slegte storie vir ons,” het Antoinette gesê.

Annel het die bekende roofdierpark op haar pa, Hennie, se plaas bedryf, terwyl Antoinette vir die gasteplaas verantwoordelik is. Annel het na tientalle roofdiere omgesien.

“Sy het ʼn absolute gawe gehad om met mense en diere te werk,” het Antoinette gesê.

Antoinette het gesê haar man en seun, Nardus, is self na die toneel om te probeer vasstel wat presies gebeur het en het gevra dat ʼn behoorlike ondersoek na die omstandighede rakende Annel se dood gedoen word.

Begrafnisreëling sal eers ná afloop van die nadoodse ondersoek gefinaliseer word.

Honderde mense het intussen boodskappe van medelye ná Snyman se dood op sosiale media geplaas. Verskeie daarvan is afkomstig van internasionale besoekers wat die roofdierpark besoek en Snyman daar ontmoet het.

Maroela Media het die polisie genader om kommentaar oor die voorval en wag op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

53 Kommentare

jongste oudste gewildste
Wonder

Ek ruik n rot …

Ai ja jai

Ek ruik n rot …

nella

Wonder !!!!! Ek stem saammet jou. Ek ruik ñ groot rot. Arme familie , sterkte vir julle.

Ig

Ek ruik baie , baie groot rotte!!!!!!

Martie

Klink te bekend.