Talle woedend vir Telkom

Telkom (Foto: Facebook)

Hordes Telkom-gebruikers wat sedert die begin van die week met stadige internetdiens én internetverbinding-probleme sukkel het hulle vandeesweek tot sosiale media gewend om hul misnoeë oor dié internetdiensverskaffer se internetverbinding-probleme uit te spreek.

Die maatskappy het Woensdagaand op sosiale media gesê ʼn gebreekte kabel is die oorsaak vir duisende gebruikers se stadige internetdiens. Telkom het gesê hy is besig om die saak te ondersoek en sal die probleem so gou moontlik regstel.

Volgens die internetdiensverskaffer het gebruikers in onder meer Johannesburg, Kaapstad, Pretoria, Durban, Port Elizabeth, Kempton Park, Centurion, Pietermaritzburg, Bellville en Boksburg internetprobleme ondervind.

Hoewel Telkom kort ná sy aanvanklike aankondiging Woensdagaand gesê het die gebreekte kabel is herstel, het gebruikers teen Donderdagoggend steeds teen die internetdiensverskaffer uitgevaar oor verbindingsprobleme en stadige internetdiens.

Hordes gebruikers se klagtes het die maatskappy Donderdag genoop om wéér ondersoek in te stel. Volgens Steven Sutherland, ʼn Telkom-gebruiker, was Telkom Donderdagoggend nie bereikbaar nie weens ʼn besige lyn.

“Haai Telkom. Die 10210-lyn was baie besig – ek het 15 minute lank aangehou,” skryf hy.

“My ADSL-lyn wil nie aan die internet verbind nie. Julle inbelsentrum antwoord nie die oproepe nie en die webwerf wil nie werk sodat ek die probleem kan aanmeld nie. Help asseblief,” sê Addul Kajee.

“Ons ervaar weer internetverbinding-probleme, veral met ADSL-lyne. Ons werk tans om die kwessie op te los. Ons vra om verskoning vir die ongerief,” het die maatskappy op Twitter gesê.

Woedende gebruikers het hulle Donderdag tot Facebook en Twitter gewend om dié probleem onder Telkom se aandag te bring.

“Telkom het twee dae terug gesê hy gaan ons kontak en vir ons ʼn verwysingsnommer gegee. Vandag is dit reeds vier dae, en nog niemand het na ons toe teruggekom nie. Ek is nie eers verras nie,” het Jade Mansfield geskryf.

“Ek het steeds nie internetverbinding nie, en byna al my data gaan in die proses verlore. Ek kan nie eers in my rekening inkom nie. Wie gaan ons vergoed vir hierdie probleme?” het Karen Lourens laat hoor.

Die internetdiensverskaffer het egter Donderdag gesê hy probeer die probleem so gou as moontlik oplos.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

86 Kommentare

jongste oudste gewildste
Lalla

So gou as moontlik, is nie die antwoord wat mense wil he wat vir dienste betaal nie. Maar laat dit nou een van julle groot kliente is, dan sal julle darem vining spring, want dan moet julle mos boetes betaal. Omdat ons nou gewone landsburgers is moet ons mos maar vat wat ons kry, geen diens, geen terugbetaling, geen antwoorde, geen niks. Hoog tyd dat julle bestuur begin kyk om na julle kliente om te sien.

Charles

Ons hier in Ermelo sukkel al lank met internet, woensdag geen internet verbinding nie, vanoggend stadiger as n slak, maar jy betasl vir n vinnige internet, swak diens net soos ander staatsdienste

Hannelize

Dit is nie net daar nie. Ons in Phalaborwa sukkel net so.

wragtig wikus

Miskien moet mens boetes inbring vir sulke tipe dientse wanneer dit afgaan – veral elektrisiteit voorsiening.

lola

dis dan die diens waarmee vodacom en mtn al jare lank in die Laeveld weg kom. dan ook die data wat ons koop. mhoekom is daar n tydperk op die gebruik daarvan! hoekom vat hulle die data/lugtyd/smse ba die sperdatum weg sonder om die verloorder te vergoed? as ek n liter petrol koop kan bp my nie sê ek het n week on fit te gebruik nie. hoekom kan die selfoonnetwerke dit doen en met dié diefstal weg kom? aan die since van die dag kan ons redeneer net soos ons wil maar in enige ander besigheid sal dit ook… Lees meer »