Taxi’s veroorsaak chaos in Durban

Verkeer Woensdag in Durban. Foto: Rescue Care Paramedics

Nooddienste in Durban het Woensdag hul hande vol gehad om by ongelukstonele uit te kom, motoriste moes erge verkeer verduur en duisende pendelaars is gestrand gelaat weens ʼn taxi-staking in die stad.

Lede van die taxi-organisasie Santaco het vroeg Woensdagoggend die strate ingevaar en versperrings op snelweë en hoofroetes veroorsaak. Honderde Santaco-lede het met hul taxi’s in konvooie gery na die Prospecton- industriële gebied, waar die voertuigvervaardiger Toyota se aanleg geleë is, om by die aanleg te betoog en ʼn griefstaat te oorhandig.

Santaco het Toyota in ʼn verklaring daarvan beskuldig dat die vervaardiger voertuie wat vir taxi’s gebruik word, se pryse opstoot. Volgens berigte is die industrie ontevrede omdat die Toyota Quantum 10 jaar gelede teen R220 000 ingevoer is en nou plaaslik teen R450 000, sonder rente, vervaardig word.

Intussen moes ʼn man wat die oggend kritieke beserings tydens ʼn voertuigongeluk opgedoen het, met ʼn helikopter na ʼn nabygeleë hospitaal geneem word.

Kyle van Reenen, woordvoerder van Crisis Medical Paramedics, het gesê die ongeluk het omstreeks 07:00 op die N2-snelweg naby Umdloti plaasgevind.

“ʼn Nissan 1400-bakkie het vermoedelik teen ʼn hoë spoed teen die agterkant van ʼn swaarvoertuig vasgery en die drie insittendes moes uit die wrak gesny word. Twee van die mans is met ernstige beserings in ʼn ambulans na ʼn hospitaal geneem.”

Hy het gesê weens die swaar verkeer in die omgewing en paaie wat versper was, is daar besluit om die man wat kritiek beseer is met ʼn helikopter van die departement van gesondheid na die Inkosi Albert Luthuli-hospitaal te neem.

Teen 09:20 kon Rescue Care Paramedics nie by ʼn ongelukstoneel in Prospecton uitkom nie weens paaie wat versper was. Hulle het bystand ontbied nadat ʼn bakkie en vragmotor op die N2 naby die Joynerweg-afrit gebots het.

Russel Meiring, woordvoerder van ER24, het gesê paramedici van dié nooddienste het omstreeks 09:30 op dié toneel aangekom.

“ʼn Vrou wat die bakkie bestuur het, het vermoedelik vir ʼn betoger uitgeswaai wat glo in die pad gestaan het. Sy het beheer oor die bakkie verloor en teen die vragmotor gebots.”

Die vrou is met matige beserings na die Prince Mysheni-hospitaal geneem. Die presiese omstandighede rakende die botsing word ondersoek.

Die polisie en metropolisie is na probleemgebiede ontplooi om die situasie te monitor.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

43 Kommentare

jongste oudste gewildste
Hendrik

Wat is die probleem? Verwyder hierdie voertuie met panservoertuie en sluit die skuldiges toe?\!

Jerome

Hierdie mense wat in die ongelukkig betrokke was moet sommer Santaco persoonlik dagvaar

vermeende

Hierdie behoort nie n probleem te wees nie, le beslag op dit wat gebruik word om n misdaad mee te pleeg en verkoop dit op n openbareveiling.
Daai ronde taxi bestuurder sal net een keer huis toe loop!

Alet

Hemel hulle is buite beheer. Hoe moet mens saam aan hierdie pragtige land van ons bou as hulle als afbreek verwoes en moor. Hoe kan mens saam hulle herenig?

William

Jy sien, hulle verstaan nie dat hulle die waarde van die rand verwoes het nie..
Dit is hoekom voertuie so duur is.
Die grootse probleem is nie-denkedes in die land.
Doen wat hulle wil, dan kla hulle dat als duurder is.

Kry lekker groot trok met stoomtrein ploeg voor, maak skoon.
Wie gee hulle die reg om paaie te versper?.
Genoeg is genoeg!..