Tieners kan van volgende week ingeënt word

Suid-Afrikaanse kinders tussen 12 en 17 jaar oud kan van volgende week teen Covid-19 ingeënt word. (Argieffoto: Marvin Recinos/AFP)

Kinders tussen die ouderdom van 12 en 17 jaar oud kan van Woensdag teen Covid-19 ingeënt word en hulle het nié die toestemming van hul ouers nodig om die entstof te ontvang nie.

Die minister van gesondheid, dr. Joe Phaahla, het Vrydagoggend gesê dié stap word gedoen op aanbeveling van die ministeriële adviesraad, met die steun van LUR’e van gesondheid en die kabinet.

Amper 20 miljoen Suid-Afrikaners ouer as 18 jaar het reeds ten minste een dosis van die Covid-19-entstof ontvang.

Die Pfizer-entstof, wat die Suid-Afrikaanse Reguleringsowerheid vir Gesondheidsprodukte (Sahpra) vir hierdie ouderdomsgroep goedgekeur het, sal ook gebruik word vir kinders. Kinders sal in hierdie stadium egter net een dosis van die entstof ontvang.

Volgens die minister was daar wêreldwyd enkele gevalle van inflammasie van die miokardium, oftewel die spierwand van die hart, by kinders wat ʼn tweede dosis van die entstof ontvang het. Phaahla sê daar was tot dusver egter geen langtermyngevolge nie en die simptome duur nie lank nie.

Terwyl navorsing daaroor voortduur, word net een dosis van die entstof vir kinders tussen 12 en 17 jaar oud aanbeveel.

“Ons kan ouers en jong mense verseker dat daar geen permanente gevaar is nie, ons tref bloot voorsorgmaatreëls.”

Die regering hoop om minstens die helfte van die sowat 6 miljoen kinders in dié ouderdomsgroep teen Covid-19 in te ent voor skole vir die jaar sluit. Die inentings sal egter nie deur skole gedoen word nie.

Dr. Nicholas Crisp, waarnemende direkteur-generaal van die departement van gesondheid, sê kinders tussen 12 en 17 jaar oud het nie toestemming van hul ouers vir enige mediese behandeling nodig nie, hoewel ouers toestemming kan gee.

Hy sê daar geld ʼn veelparty-ooreenkoms tussen die departement van gesondheid, departement van onderwys en skoolbeheerliggame oor hoe toestemming binne die skoolstelsel gegee word en hoe dit binne dié konteks sal werk. Om hierdie rede word die proses nie tans deur skole van stapel gestuur nie.

Die elektroniese entstofdatastelsel (EVDS) word intussen aangepas om die nuwe ouderdomsgroep in te sluit en bykomende newe-effekte aan te dui. Kinders sal van Woensdag op die stelsel kan registreer en kan op dieselfde dag by enige sentrum aanmeld om die entstof te ontvang.

Verpligte inenting vir gesondheidswerkers?

Phaahla het vanoggend weer benadruk dat die regering nie verpligte inentings oorweeg nie, ook nie vir gesondheidswerkers wat nie die Covid-19-entstof ontvang het nie.

Hy sê die regering gaan voort met die benadering om mense eerder te oortuig van die doeltreffendheid en veiligheid van die entstof, as om dit verpligtend te maak. Verskeie regskenners het reeds aangedui dit sal waarskynlik nie ongrondwetlik wees om inenting te verplig nie.

“Ons wil baie versigtig hierna kyk,” sê die minister.

Sowat 77% van alle werkers in die gesondheidsektor het reeds die entstof ontvang, hoewel die persentasie in die private sektor moeiliker is om akkuraat te bepaal.

Phaahla sê daar was die afgelope ruk toenemende oproepe dat ʼn bykomende dosis van die entstof aan gesondheidswerkers gegee word. Die eerste gesondheidwerkers het sowat agt maande gelede as deel van die Sisonke-program hul entstof ontvang. Volgens die minister word die versoek oorweeg.

Die ministeriële advieskomitee het wel reeds goedkeuring gegee dat diegene met ʼn verswakte immuunstelsel ʼn bykomende dosis ontvang. Dit sluit in mense wat dialise kry of ʼn orgaan- of ander oorplanting gehad het.

Phaahla sê dit moet egter net op aanbeveling van ʼn mediese praktisyn en dan onder streng toesig gedoen word.

  • Volgens die departement het Covid-19-gevalle die afgelope sewe dae met gemiddeld 28% afgeneem, sterftes is 16% laer en die positiwiteitskoers staan op 2,7%. Daar was ook ʼn 3,5%-afname in hospitaalopnames.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

167 Kommentare

jongste oudste gewildste
Jacob

Indien ‘n kind onder die ouderdom van 18 jaar oud sonder die ouer se toestemming inge-ent word, moet die ouer ‘n klagte lê in terme van die kinderwet teen die persoon wat die entstof toegedien het en ‘n saak van aanranding met die doel om ernstig te beseer teen die persoon wat die inenting gedoen het, aanhangig maak. Dit is volgens prokureur Schalk van der Merwe. Van der Merwe stel dit ook duidelik dat geen werkgewer sy werknemers kan dwing om inge-ent te word nie aangesien werkgewers nie wette kan en mag maak nie. Hy stel ook voor dat studente… Lees meer »

Madeleine

Baie hartseer nuus!! Nie eers ouers toestemming nodig nie!? Evil!!

Erik

Wonderlike nuus. Baie dankbaar!

Willem

So nou gaan die Staat sonder ouers se toestemming hierdie eksperimentele “entstof” vir kinders inspuit wat in elkgeval ‘n 98,5% herstelkoers het? Die “entstof” keer nie dat jy Covid opdoen nie en jy kan steeds die virus versprei!? Dit gaan my verstand te bowe.

Miskruier

Dis die ouderdoms groep wat meer newe effekte van die vac oorhou as van die virus self.