Tienling is wél gebore – departement

Die 37-jarige Gosiame Thamara Sithole van Tembisa het vandeesweek aan 10 babas geboorte geskenk. Langs haar sit haar man, Tobogo Tsosetsi. (Foto: Thobile Mathonsi/African News Agency/IOL)

Nadat dit die afgelope twee dae gegons het oor die geboorte van ʼn tienling in Gauteng en hoe dit met hulle gaan, het die Gautengse departement van maatskaplike ontwikkeling Woensdagmiddag bevestig dat hulle op die hoogte is van waar die tienling en hul ma, Gosiame Sithole, hulle bevind.

Volgens Feziwe Ndwayana, woordvoerder van die departement, is Sithole sedert 2016 – toe haar eerste twee kinders, ʼn tweeling, gebore is – “ʼn kliënt” van die departement.

Ndwayana sê Sithole se dokter het aanbeveel dat sy ruimte gegun word om te rus en te begin genees.

Sy verkeer in dié stadium glo in heelwat pyn.

“Ons maatskaplike werkers sal die ma môre gaan besoek. Sy is steeds in die hospitaal. Om die gesin te beskerm, kan ons egter nie nou bekend maak in watter hospitaal hulle is nie,” sê Ndwayana.

Op ʼn vraag oor die toestand van die tienling, het Ndwayana gesê verdere inligting sal eers bevestig kan word wanneer die maatskaplike werkers Sithole besoek het.

Sy het egter bevestig dat tien babas wel gebore is.

Die nuus oor die tienling se geboorte het wêreldwyd opslae gemaak, maar daar was tot dusver  bitter min amptelike inligting oor ma en babas se gesondheid. Selfs die nasionale regering het Dinsdag ʼn beroep op enigiemand met inligting gedoen om na vore te kom.

Guinness-wêreldrekords het vroeër gesê hulle het kennis geneem van die babas se geboorte, maar die nuwe wêreldrekord kon nog nie bevestig word nie.

Pretoria News, wat die aanvanklike berig oor die tienling se geboorte geplaas het, het berig Sithole se man, Tsotetsi, is werkloos. Die gesin het ook ʼn pleidooi om hulp tot Suid-Afrikaners gerig – een wat reeds ruimhartig ondersteun is.

Op sosialemediaplatforms is daar selfs gevra dat ʼn nasionale babatee vir die gesin gehou word.

Geen foto’s van die tienling is nog gedeel nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
deHAS

Die Mama lyk baie vol liefde, seker van die tien siele wat sy dra. Dis merkwaardig, wonder of dit sedlsaam is of dit miskien meer en meer gaan gebeur.

WLM

Daar het jy dit nou. Perde bolle is toe wragtag al die tyd vye.

Misky

Die man boonop werkloos ook….. ek vermoed hulle onderhandel intussen en kyk wie offer meeste geld en wie fotos van babas gaan plaas

Vonkprop

Iets klink nie lekker nie. Hoekom alles so geheim hou? Ek wil my verstout deur te sê dit is amper asof hulle skarrel om tien babas bymekaar te maak om hierdie geloofwaardig te maak.

JM

GENADE! Nou het ek alles gehoor!