TLU SA eis verduideliking oor gewysigde jagregulasies

Argieffoto (Foto: klimkin/Pixabay)

TLU SA dring aan op ʼn verduideliking oor gewysigde regulasies wat Dinsdag in die Staatskoerant gepubliseer is en die reis oor provinsiale grense vir jagdoeleindes verbied.

Die departement van omgewing, bosbou en visserye het met die wysigings ook ʼn stokkie gesteek voor akkommodasie vir jagters.

“Dit is uiters onverskillig en irrasioneel om sulke regulasies te publiseer,” sê Louis Meintjes, die president van TLU SA. “Dit is nog ʼn ekonomiese slag vir wildsboere wat reeds groot verliese gely het as gevolg van die eerste weke van die afsonderingsperiode se regulasies. Ons lede het reeds deposito’s ontvang en voorbereidings getref vir jagters wat van ander provinsies by hulle sou gaan jag. Die risiko vir die verspreiding van Covid-19 op verafgeleë gebiede, waar min mense met mekaar in aanraking kom, is minimaal.”

Wildsboere moet vanjaar sonder die inkomste van internasionale jagters klaarkom en het staatgemaak op plaaslike jagters om gedurende die jagseisoen ʼn gedeelte van hulle inkomste op te maak. Daar is nou baie min geleentheid vir hierdie boere om ʼn inkomste te verdien om sodoende die wildsplase aan die gang te hou.

Dit sal ook ʼn invloed hê op werksgeleenthede. Volgens ʼn verslag van Wildbedryf Suid-Afrika (WRSA) in April, is 67% van werknemers in die wildbedryf negatief geraak deur die beperkings.

In baie landelike gebiede is die plattelandse ekonomie afhanklik van jagters en wildsboere se spandering. Dit is inderdaad wat die landelike omgewing aan die gang hou.

“Ons versoek die departement en regering om ʼn verduideliking te verskaf waarom hierdie regulasies skielik gewysig is,” sê Meintjes. “Boere is reeds baie ontevrede oor hoe die afsonderingsperiode hulle beïnvloed, terwyl die regering op hulle staatmaak om voort te gaan om voedsel te produseer. Die dag sal kom wanneer boere nie meer in hierdie vraag kan voldoen nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Joggie

Geen verduideliking sal gegee word nie. Die agenda is om die landbousektor so seer as moontlik te maak, siek regering waarmee ons opgeskeep is!

Trevor

Dit raak maar seker tyd dat ons almal doen soos ons wil en wat ons wil, n taxi mag vol persone ry , maar 4 jagters mag nie eens op n 1600h plaas kom nie, Is is very apparent that certain sectors are targeted in a concerted effort to force equality , at the expense of workers earning a income

Oompievis

Nog ń regulasie om totale beheer te probeer kry oor die wetsgehoorsames. Moet die span nie eerder konsentreër om te poliesieer waar die ongehoorsame wetteloses chaos saai nie?

Alleen Wolf

Dis ironies dat wild veilings steeds gehou kan word, wonder hoeveel invloed het C.R. se eie opkomende wild veilng op die besluit gehad?

Hoekom

Hierdie regulasies het niks met covid19 te doen nie. Deel van die ANC se “reset the economy” plan. Niks gaan oorbly nie…