TLU SA skepties oor grondverslag

(Foto: TLU SA/Facebook.com)

Die landbouorganisasie TLU SA sê hy het geen vertroue in die verslag van die presidensiële adviespaneel oor grondhervorming en landbou wat vroeër vandag aan pres. Cyril Ramaphosa oorhandig is nie.

Die paneel, wat uit verskeie kenners bestaan, is in September verlede jaar aangestel om die inter-ministeriële komitee oor grondhervorming, waarvan adjunkpres. David Mabuza die voorsitter is, te adviseer oor ʼn wye verskeidenheid beleidsake soos restitusie, herverdeling, verblyfreg en landbousteun.

Dr. Vuyo Mahlati, president van die African Farmers’ Association of South Africa (Afasa), was die voorsitter van die paneel.

Die paneel moes ook ʼn uiteensetting gee oor grondbeleid gesien in die lig van voortslepende ongelykheid, onbevredigende grond- en landbouhervorming asook ongelyke stedelike grondontwikkeling.

“TLU SA is baie skepties oor die verslag en koester geen positiewe hoop oor die inhoud daarvan nie,” sê Henk van de Graaff, voorsitter van TLU SA se komitee oor eiendomsreg.

“TLU SA is geen geleentheid gebied om enige insette daarin te lewer nie, terwyl ons reeds etlike jare gelede ons plan vir volhoubare landbou bekendgestel het. Nie die regering of enige van sy instellings het enige belangstelling daarin getoon nie, waarskynlik omdat dit fokus op die vryemarkbeginsels.”

Daar was vroeër al omstredenheid oor die verslag toe ʼn sogenaamde minderheidsverslag ook saamgestel is, omdat sommige van die paneellede glo nie met die verslag saamgestem het nie.

Mahlati het daarna in ʼn skerp bewoorde verklaring gesê Dan Kriek, voorsitter van AgriSA, en Nick Serfontein, ʼn boer van die Vrystaat, is in hul private hoedanigheid lede van die paneel en dat AgriSA se toegang tot vertroulike paneeldokumente “kommerwekkend” is. Luidens berigte het Kriek en Serfontein die verslag saamgestel.

TLU SA sê die feit dat daar ʼn minderheidsverslag saamgestel is, ook vanuit die georganiseerde landbou, omdat ook húlle insette nie vervat is in die finale verslag nie, versterk die vermoede dat hierdie verslag net ʼn eggo is van die regering se sosialistiese standpunte, sonder om die aktiewe landbougemeenskap se voorstelle te oorweeg.

Die organisasie sê die verslag gaan daarom waarskynlik ʼn polities-ideologiese dokument wees, eerder as ʼn ekonomiese dokument wat op groei fokus.

“Daarom stel TLU SA dit op rekord dat ons ons nie gebonde ag aan enige bevinding of voorstel in die verslag nie en dat daar volledig op die inhoud gereageer sal word sodra pres. Ramaphosa dit amptelik bekend stel,” sê Van de Graaff.

Die presidensie het gesê die verslag word eers aan die kabinet voorgelê, waarna dit aan die publiek bekendgestel sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Sieg

Boere moenie plant nie, maak kos pepper duur, gee die regering pakslae, n voorsmaak as hulle die grond gaan vat. Laat hulle die duur kos invoer, hulle sal vinnig sien, maak pap per kilogram sommer vier keer die prys.

Dirk

Of n organisasie hulself gebonde ag of nie, dit gaan niks verander aan die uitkoms van die herverdeling van grond volgens sosialistiese politieke beginsels van huurpag waar die staat die eienaar is en die grond verhuur. Staatskaping fase 2 is reeds in aanvang om beheer te vat van finansiele instellings, waarna privaatgrond tersprake sal kom. Hoe op deesaarde “slaan terug” dink hulle kan hierdie magsvertoonmomentum stop, sal nog eers gesien moet word.

Gert van Wierdapark

Dis logies dat daar skeptisisme oor die verslag sal moet wees. Dat dit as advies moet dien waar vriend Dawid voor sit, is nog erger. Wolf wat die skaapwagter moet wees, en boonop sommer ook die varkies se huisies wil omblaas in die proses. Die a en see leef in hul eie sprokie van grondhervoming. Dit wat aangebied word, kan eerder ‘n lag-vers of vers-lag genoem word! Daar is geen Grondige rede dat verwag kan word dat dit Gegrond sal wees op ‘n basis van verstaan en omgee nie!

Hanna Hoekom

Die besluit is reeds geneem. Ek dink nie enige insette sou ooit n verskil kon maak nie. “Our people” wil grond he. Hoop hulle kan grond eet… Vra maar die Zimbabweans hoe dit gedoen word.

cr

fw de klerk Dit is danksy jou dat ons boervolk nou geteiken word deur ‘n sukkelende en koerupte regering om al ons bates te vat. jy Moes nooit president geword het nie, jy het ons veraai. Ek hoop jy lees die!