Toenemende kommer oor MRK se hantering van Etzebeth-saak

Eben Etzebeth. Foto: Twitter

Al hoe meer vrae word gevra oor die Menseregtekommissie (MRK) se hantering van die ondersoek na die beweerde rassevoorval waarby die Springbokslot Eben Etzebeth betrek word.

Die MRK het in Augustus ʼn klag ontvang oor ʼn beweerde bakleiery buite ʼn kroeg in Langebaan aan die Weskus. ʼn Man het beweer hy is deur ʼn groep mans aangerand en rassistiese aanmerkings toegesnou. Etzebeth was glo hierby betrokke.

Etzebeth het vroeër al ontken dat hy enigiemand aangerand of rassistiese aanmerkings toegesnou het tydens die voorval.

Die MRK het die Langebaan Vier, soos die altesame vier klaers in die saak nou bekend staan, se klagte namens hulle by die gelykheidshof ingedien.

Enver Wilsenach, Yorayda Papier, Mogamad Smith en Kay Lee Brook voer in hofstukke aan dat Etzebeth hulle die h-woord toegesnou het. Die voorval het glo op 25 Augustus buite die Watergat-restaurant in Langebaan plaasgevind.

eNCA berig die vier is aangeraai om nie met die media te praat nie, uit vrees dat dit hul saak kan benadeel. Hulle eis nou onder meer skadevergoeding van R1 miljoen, dat Etzebeth gemeenskapsdiens doen en ʼn woedebestuurskursus ondergaan. Hulle eis ook dat Etzebeth ʼn openbare verskoning aan die bruin gemeenskap maak.

Dr. Dirk Hermann, bestuurshoof van Solidariteit, het gesê die feit dat die klaers dadelik R1 miljoen eis, maak die saak verdag. Hy sê dit gaan moontlik nie meer oor reg nie, maar oor geld.

“Die MRK is nie veronderstel om populisties te wees nie. Hulle is nie ʼn politieke party wat steun moet werf nie. In die saak het hulle hul objektiwiteit verloor.

“Etzebeth is die afgelope tyd in ʼn boendoehof aangekla, verhoor en skuldig bevind. Die MRK het lustig meegedoen. Solidariteit het die afgelope week ʼn veldtog bekend gemaak teen vals klagtes van rassisme. Die verskynsel om mense vals aan te kla vir eie belang is besig om sistemies te raak en die MRK is bewus daarvan.

“Hulle behoort sensitief daaroor te wees, maar het roekeloos ingestorm. Etzebeth se menswaardigheid en eer moet ook in die proses beskerm word. Die MRK het ook ʼn verantwoordelikheid teenoor Etzebeth. Die SAMRK gaan aandadig wees aan ʼn menseregte-onreg teenoor Etsebeth as hy onskuldig is,” het Hermann gesê.

“Die feite ter tafel tot dusver is baie verdag en geensins oortuigend nie. Etzebeth verdien ʼn behoorlike proses. Ter wille van alle partye moet ordelike prosesse gevolg word. Die klimaat wat nou al geskep is, maak ʼn billike verhoor byna onmoontlik.”

Jan Bosman, voorsitter van die AB, het Vrydag gesê wat ook al op die betrokke aand in Langebaan gebeur het, moet objektief en regverdig beoordeel word. “Indien enige kwetsende taal gebruik is, moet dit met bewyse gestaaf word en die reg sy loop neem,” het Bosman gesê.

“Die kern is egter dat feite objektief en regverdig beoordeel moet word. Dit word al hoe meer duidelik dat Etzebeth die spilpunt van die perfekte storm geword het, aangeblaas deur ʼn klomp individue wat later betrokke geraak het. Van ʼn regverdige en billike hantering deur die MRK is daar nie sprake nie en indien enigiemand dalk nog getwyfel het oor balans en konsekwentheid by die kommissie en optrede binne sy mandaat, moet dié geval enige twyfel uit die weg ruim.”

Die VF Plus het in reaksie gesê die uitlatings van adv. Buang Jones, nasionale hoof van die Menseregtekommissie (MRK) se regsafdeling, Donderdag oor Etzebeth se beweerde gebruik van haatspraak, is uiters voortydig en bevooroordeeld.

Jones het Donderdag tydens ʼn gemeenskapsvergadering in Langebaan gesê die MRK wil ʼn voorbeeld van Etzebeth maak. “Ons wil aan ander rassiste wys dat die k- of h-woord pynlik en skadelik is en bruin mense verontmenslik.”

“Die MRK is, soos deur Jones ook bevestig, veronderstel om sy werk sonder begunstiging te doen, tog blyk dit Etzebeth is reeds deur die MRK skuldig bevind, voordat hy ʼn geleentheid gekry het om homself te verdedig,” het dr. Pieter Groenewald, leier van die VF Plus, gesê.

“Die VF Plus veroordeel alle vorme van rassisme van enige lid van die samelewing. Die MRK toon egter tans duidelik dubbele standaarde deur die Etzebeth-aangeleentheid met die uiterste dringendheid te hanteer. Dít terwyl ander klagtes, soos dié teen die leier van die BLF, Andile Mngxitama, oor sy rassistiese uitsprake en haatspraak, hoegenaamd nie met dieselfde graad van dringendheid hanteer is nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Dirk

Onderwerp daai 4 aan ñ leunverklikkertoets. Gegrond op die uitslae, maak dan ñ saak. Teen Eben, of teen hulle.

Wurmpie

Hul sal tot vir ń leunverklikker toets lieg as hul geld kan kry

James

Wag tot Eben terugkeer – (hopelik na die kwarteindrondtes, ek het geen behoefte meer om die Bokke in die finaal te sien nie) – en laat die reg dan sy gang gaan. Indien ‘n behoorlike Hof Eben skuldig bevind op aanklagtes van aanranding/rig van ‘n vuurwapen/poging tot moord/haatspraak: Laat hy dan die gevolge dra. Indien ‘n behoorlike Hof Eben onskuldig bevind, doen ek hiermee ‘n beroep op Eben: Ry die SAHRC en die 4 klaers vir ELKE PENNIE wat hulle het. Dagvaar vir hulle dat die trane loop, en die Balju elke stukkie wat hulle besit kom opskryf en veiling… Lees meer »

leser

“‘n man is aangerand en etzebeth was deel daarvan”, ‘n man, nou is daar 4, more is daar 20, wie se etzebeth het iemand geslaan of h…t genoem, dis alles hoorse
etzebeth, ek staan agter jou en weet jy is onskuldig, maar ons het nou hul name, dit maak dit net makliker ………………

JJ

Gaan kyk die video op youtube. Luister hoe vloek hulle in die Kaapse taal. Die ma se p en n. En hou aan om Eben se naam te gebruik toe hulle hom erken. Nou lê hulle n klag van haatspraak. Lagwekkend