Tien toeriste is Woensdag gered nadat ʼn vaartuig by The Heads in Knysna omgeslaan het.
Jerome Simonis, bevelvoerder van die plaaslike Nasionale Seereddingsinstituut (NSRI), het gesê hul vrywilligers is omstreeks 13:20 na die toneel ontplooi toe personeel van East Head Cafè gesien het hoe die boot in die see omslaan. NSRI-bemanning, in verskeie vaartuie, en hul dokters was binne sewe minute op die toneel.
Reddingspanne van die polisie, die brandweer, asook die Wes-Kaapse nooddienste en bewaarders van SANParke is ook ontplooi.
“Altesaam 11 mense was aan boord die 8,9 m lange opblaasboot toe dit omgeslaan het. Die seedeinings was tussen drie en vier meter hoog,” het Simonis gesê. “Al 11 mense is gered en veilig na die strand geneem waar mediese spanne hulle ondersoek het.”
Simonis het gesê slegs twee van die toeriste moes na ʼn nabygeleë hospitaal geneem word vir waarneming en hul toestand is bevredigend. Die skipper en ander toeriste is ongedeerd.
Die Suid-Afrikaanse Maritieme Veiligheidsowerheid (Samsa) het ʼn ondersoek van stapel gestuur om vas te stel hoekom die boot omgeslaan het.
Sal te bang wees om in ‘n opblaasboot daardie hoë golwe te trotseer.
Seeduine tussen 3 en 4 meter? Julle bedoel seker deining
Dagsê Neels
Dankie vir jou kommentaar. Ons vra om verskoning vir die oorsig. Die berig is reeds gewysig.
Groetnis
Mariné
nms Maroela Media
Party mense lees nuus net om spel foute te soek en weet niks wat in nuus aangaan nie.