Trane loop oor hulp vir kleuterskool-assistent

“Ek dink nie ek het iemand al só dankbaar gesien nie.”

Só vertel die werkgewer van die kleuterskool-assistent wat haar kêrel én been verlede maand weens ’n rooftog in Mamelodi in Pretoria verloor het. Sy kry nou ʼn prostetiese been, wat haar ’n nuwe kans op die lewe bied.

’n Emosionele Martha Lebakeng (40) was Woensdagoggend oorstelp van dankbaarheid toe Jacaranda FM se Good Morning Angels haar die goeie nuus meedeel dat weldoeners haar met ’n prostetiese been gaan toerus sodat sy kan terugkeer na die werk waarvoor sy só lief is.

Meer as tien ouers van die Speel Speel Skool in Wingate Park waar Martha werk, het ná die skietvoorval na Good Morning Angels uitgereik om Martha by te staan.

Fritz Neethling van Meintjies and Neethling Orthopaedics in Pretoria het gevolglik aangebied om ’n prostetiese been ter waarde van sowat R160 000 gratis vir Martha te bou, terwyl ’n anonieme skenker die koste van die onderdele vir die been sal dek.

Annelie Burger, arbeidsterapeut van beroep en ouer by die kleuterskool, het op haar beurt aangebied om Martha vir die volgende 18 tot 24 maande gratis met haar rehabilitasie te help. Die rehabilitasiekoste alleen sou na verwagting tot R80 000 beloop.

Sybrand Bezuidenhout van Goldwagen het intussen onderneem om R25 000 aan Martha se behandeling en rehabilitasie te skenk, terwyl Good Morning Angels nóg R25 000 uit sy fonds sal bydra.

WATCH: Martha was struck by bullets in both her legs and lost her partner. Watch how her life takes a positive turn below.

Breakfast with @MartinBester https://t.co/kRfhLk7eRk

— JacaBreakfast (@JacaBreakfast) November 10, 2021

“Ons sien daarna uit dat jy weer saam met die kinders sal kan dans,” het Bezuidenhout vanoggend in ’n stemboodskap aan Martha gesê.

“Dankie Here. Dankie dankie. Dankie almal,” het ’n huilende Martha gesê terwyl sy haar gesig met haar hande bedek het.

Maroela Media het vroeër berig Martha se vriend, Tumi Sekgobela, is op 23 Oktober tydens ’n vermoedelike rooftog in Mamelodi doodgeskiet. Martha is die betrokke dag in albei haar bene geskiet toe sy Tumi te hulp gesnel het en haar linkerbeen is kort daarna noodgedwonge bo die knie geamputeer.

Een van Martha se grootste bekommernisse sedertdien is dat sy haar werk as assistent by die Speel Speel Skool se babaklas gaan kwyt wees weens haar amputasie.

Nicola Maree, skoolhoof van die kleuterskool, het vanoggend aan Maroela Media gesê ’n prostetiese been sal Martha se lewe voorwaar ten goede verander. “Dit gaan haar so baie help. Sy moet heeldag mobile wees by die skool – dán is dit melk, dán is dit kinders aan die slaap maak.

“Martha kan nie ophou dankie sê nie.”

Maree vertel dat die personeel en kindertjies by die kleuterskool Martha vanoggend ná die radio-uitsending by die kleuterskool verwelkom het. Dié geliefde assistent sal egter na verwagting eers volgende jaar weer kan begin werk en verkeer nog in baie pyn.

“Ons sukkel sonder haar en ons wil haar nie vervang nie. Sy is regtig hands on en die kinders verlang na haar,” vertel Maree.

Sy meen die feit dat soveel ouers na Good Morning Angels uitgereik het, getuig daarvan dat Martha geliefd en van onskatbare waarde vir haar skoolgemeenskap is.