Trekkers, plaasimplemente ingespan vir optog teen plaasaanvalle

Alwyn en René van Zyl (Foto: Verskaf)

“Ons wil die publiek wys wie ons boere werklik is. Daarom vat ons ons trekkers saam na die hof toe.”

Só vertel Hendrik Botha, ondervoorsitter van die Transvaalse Landbou-unie (TLU SA) se Potgietersrus-distrik. Die unie reël ʼn optog eerskomende Dinsdag waar boere op hul trekkers, in vragmotors, bakkies en selfs met plaasimplemente in konvooi na die Mookgophong-landdroshof in Limpopo gaan saamtrek. Die drie verdagtes wat na bewering vyf maande gelede op Alwyn van Zyl (79) en sy vrou, René (66), se plaas digby Mookgophong (Naboomspruit) toegeslaan het, sal na verwagting dan in die hof verskyn. Alwyn is tydens die aanval vermoor.

Maroela Media het vroeër berig die Van Zyl-egpaar is Vrydag omstreeks 00:15 deur omtrent vyf aanvallers in hul plaashuis by Bad se Loop digby Naboomspruit oorrompel en aangerand. Die egpaar het gelê en slaap toe die mans die plaashuis betree het.

Die aanvallers het Alwyn se voete en arms met klere vasgemaak. Hulle het hom daarna verwurg. Hulle is toe na die ander kamer waar hulle Pauline gedreig en geld en vuurwapens geëis het. Hulle het haar met skoenveters vasgemaak en toe die kamer geplunder, op soek na goed om te steel. Pauline, wat die aanval oorleef het, is na wat verneem word steeds erg getraumatiseerd.

Boere van die Naboomspruit-omgewing gaan hul trekkers en waens inspan om aan die optog deel te neem.

“Ons wil die oggend om 09:00 by al vyf die ingange na Naboomspruit byeenkom en dan saam in konvooi na die hof ry. Van die boere gaan dan die hofverrigtinge bywoon.”

Botha sê daar is sover sowat 600 baniere vir die optog gemaak. Hy sê hulle hoop meer as 500 boere daag op.

Dit is die soveelste optog van sy soort die afgelope maand. Die eerste optog teen plaasaanvalle was op 30 Julie toe lede van die gemeenskap van Jan Kempdorp, Magogong en Hartswater na die Hartswater-landdroshof saamgetrek het in protes teen die moord op Dan (83) en Breggie (79) Brand en hul dogter Elzabie.

“Ons kan met hierdie optogte sien dat boere keelvol is vir plaasaanvalle en -moorde,” vertel Botha. “Ons wil die wêreld wys dit is nie lekker om met ’n wapen rond te loop en elke dag in vrees te leef nie. Dit is nie maklik om ’n boer te wees nie.”

Alwyn was een van die stigterslede van die Naboomspruit Boerevereniging. Hy was ook ʼn aktiewe lid van die TLU.

Botha vertel Alwyn se familie voel baie positief oor die optog en het waardering vir dit wat die boere vir hulle doen. “Hulle voel as net een lewe deur die optog gespaar kan word, is dit klaar die moeite werd,” sê Botha.

“Die mense in ʼn boerdery gemeenskap is baie heg aan mekaar verbind. As ʼn boer in die gemeenskap sterf, raak dit nie net die familie nie, maar ook die hele gemeenskap. Dit het ʼn demoraliserende effek op die gemeenskap.”

Boere wat Alwyn geken het, het aan Maroela Media gesê hy sou nie ʼn vlieg skade aandoen nie. “Hy het glad nie verdien wat met hom gebeur het nie,” sê die een boer.