Tribunaal bevind regter Motata is skuldig aan rassistiese wangedrag

Die foto van Nkola Motata is geneem kort nadat hy in Januarie 2007 onder die invloed van alkohol bestuur het en deur die tuinmuur van ‘n huis in Sandton gebars het.

Die Regterlike Gedragstribunaal (RGT) het Dinsdag in AfriForum se guns beslis dat regter Nkola Motata hom aan rassistiese wangedrag skuldig gemaak het tydens ʼn voorval in Januarie 2007 waar die regter onder die invloed van alkohol teen ’n muur van ’n woonhuis in Johannesburg vasgery en daarna op die toneel rassistiese uitsprake oor wit mense gemaak het.

In ʼn klankopname wat Richard Baird (eienaar van die huis waar die ongeluk plaasgevind het) van die voorval in Januarie 2007 gemaak het, kan gehoor word dat Motata onder meer sê dat dit “die wit man se land was, maar dit is nie meer nie” en “geen wit man gaan my kritiseer nie”. Motata het ook die volgende aan lede van die Johannesburgse metropolisie wat hom wou kalmeer, gevra: “Waarom staan julle agter die wit man?”

Motata het ook ʼn lid van die Johannesburgse metropolisie wat hom in hegtenis geneem het, gedreig deur te sê: “Jy sal spyt wees hieroor.” Tydens Motata se skuldigbevinding aan dronkbestuur in die Johannesburgse landdroshof het die landdros in sy uitspraak aangedui dat die bandopname deur die hof as getuienis aanvaar is en dat Motata inderwaarheid rasseskeltaal geuiter het.

Kallie Kriel, AfriForum se uitvoerende hoof, het gesê die RGT het ook bevind dat Motata ʼn gebrek aan integriteit getoon het in die wyse waarop hy sy regspan tydens die dronkbestuur-hofsaak teen hom toegelaat het om aan te voer dat hy nie onder die invloed van alkohol was nie, terwyl hy inderdaad onder die invloed was.

“Die RGT, wat deur die Regterlike Dienskommissie (RDK) aangestel is om die onderskeie klagtes wat AfriForum en adv. GC Pretorius SC destyds teen Motata aanhangig gemaak het, te ondersoek, beveel ook aan dat die RDK ingevolge artikel 177(1)(a) van die Grondwet die proses begin om Motata as regter af te dank. Die datum waarop die RDK die RGT se bevinding gaan oorweeg, is nog nie vasgestel nie,” het Kriel gesê.

Volgens Kriel is die RGT se bevinding nie net vir AfriForum ʼn oorwinning nie, maar vir almal wat glo dat prominente figure in die samelewing nie toegelaat moet word om met rassistiese uitsprake weg te kom bloot op grond van hulle posisie nie.

“Sou die RDK die RGT se aanbeveling aanvaar en die proses begin om Motata af te dank, sal dit geskiedenis maak, aangesien dit die eerste keer sal wees dat ʼn regter uit sy amp verwyder word weens wangedrag.”

Kriel het daarop gewys dat die RGT se bevindings en aanbevelings nou die RDK en die parlement voor ʼn groot toets te staan sal bring. Dit is volgens Kriel geen geheim nie dat daar verteenwoordigers soos Julius Malema op die RDK is wat dink dat dit aanvaarbaar is om rassistiese uitsprake rakende wit mense te maak.

“Indien die RDK Motata beskerm ten spyte van die RGT se bevinding, sal dit die integriteit van die RDK ernstig in gedrang bring,” het Kriel gesê. Hy voer verder aan dat, sou die RDK wel besluit om teen Motata se anti-wit-rassisme op te tree, die saak na die parlement verwys sal word wat met ’n tweederdemeerderheid sal moet besluit om Motata finaal af te dank. “Parlementslede sal dus ook getoets word oor of hulle anti-wit-rassisme aanvaarbaar vind.”

Klik hier vir die RGT se volle bevinding

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

56 Kommentare

jongste oudste gewildste
AD

2jaar in tronk o ja skies dubbel standaarde. Hulle gaan net se hy was stout en moet nie weer nie…

Mielie

Kry hy nog n staatsalaris? Indien wel moet hy elke liewe sent plus R100k terugbetaal

Hendrik

Stuur hom ook twee jaar tronk toe. As regter behoort hy aan ‘n hoër standaard ten opsigte van rassisme the voldoen as Vicky Momberg.

Johann

ASKUUS!!!!!! 2007?????En intussen sit die dronkie; rassis by die huis met VOLLE BETALING? Lagwekkende belaglikheid in die gekke parradys genaamd SA!

David

Hoekom word hy nie ook toegesluit nie?