Tronkbewaarder sterf tydens gyselaardrama

Argieffoto

ʼn Vroulike tronkbewaarder van Goedemoed-gevangenis is dood toe sy met ʼn skerp voorwerp aangeval is.

Brig. Motantsi Makhele, provinsiale woordvoerder van die polisie in die Vrystaat, het in ʼn verklaring gesê die vrou en nog ʼn vroulike kollega is Vrydag omstreeks 15:30 gyselaar gehou in ʼn kantoor by die korrektiewe sentrum.

“Volgens inligting het ʼn gevangene, wat besig was met skoonmaakwerk, albei beamptes in ʼn kantoor in gedwing en homself saam met hulle in die kantoor toegesluit. Owerhede by die sentrum het dadelik reaksiespanne ontbied, insluitend ʼn gyselaaronderhandelaar van die Suid-Afrikaanse Polisiediens,” het Makhele verduidelik.

Die onderhandelaar het ongeveer drie uur lank met die gevangene onderhandel waarna hy homself oorgegee het.

“Toe die reaksiespanne die kantoor betree het, het hulle op die 35-jarige vroulike tronkbewaarder se liggaam afgekom. Sy het in ʼn plas bloed gelê en het verskeie steekwonde opgedoen terwyl sy gyselaar gehou is.”

Die 33-jarige kollega het die voorval oorleef. Sy word vir skok behandel.

“Die gevangene is weer in hegtenis geneem. Hy sal aangekla word van moord en ander klagtes wat mag spruit uit onderhoude met die bewaarder wat die voorval oorleef het. ʼn Nadoodse ondersoek word ook gedoen.”

Besonderhede van die oorledene en haar kollega sal eers bekend gemaak word sodra hul families en naasbestaandes in kennis gestel is.

Richard Mamabolo, woordvoerder van die polisievakbond Popcru, het gesê die vrou wat die voorval oorleef het, is vermoedelik verkrag tydens die gyselaardrama.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Helena.

Dit moes n baie benoude tyd gewees het vir die vroue. Was dit n manlike gevangene? En waar kom die wapen vandaan wat hy/sy gebruik het. Daardie mense is nie vir hul plesier in die tronk nie so waarom hulle vertrou. Dis tog baie jammer dat tralies hulle nie kan beheer nie.

Gert J

sulke gemors van kriminele kort die doodstraf. HULLE KAN NIE GEREHABILITEER WORD NIE.

Dion Els

Sterkte aan al die familielede, en al my ander kollegas op Goedemoed. Ja ons het n gevaarlike werk en baie sien dit dalk nie so nie, en min word van ons ooit melding gemaak. N besering aan een, is n besering aan almal. Julle is in my gebede kollegas

Asmain

Ek kan nie verstaan hoekom moet daar altyd in gyselaar situasies onderhandel word nie – kry n skerpskutter en haal die wetter uit. Sterkte aan die familie van die oorledene en ook vir die getraumatiseerde kollega, dink nie mens herstel ooit volkome van so n traumatiese ondervinding nie…en die hartseer is oor n paar jaar is die moordenaar weer uit op vrye voet.

Timjan

Employment equity…
Daar is seker agv bg vroue bewaarders by mans afdelings en andersom in ons land met min tot geen misdaad.
Die stelsel het julle gevaal.
Meegevoel met die naasbestaandes