Tshwane se eerste burger op spesiale verlof geplaas

Sheila Senkubuge, burgemeesterkomiteelid oor paaie en vervoer, en Stevens Mokgalapa, burgemeester van Tshwane. (Foto: Christel Cornelissen)

Tshwane se burgemeester, Stevens Mokgalapa, is Dinsdagmiddag op spesiale verlof geplaas.

Dit volg ná ʼn storm losgebars het oor sy beweerde seksuele eskapades met die burgemeesterskomiteelid vir paaie en vervoer, Sheila Senkubuge.

ʼn Klankgreep van die twee se beweerde gekafoefel is Sondag wyd op sosiale media versprei. Dit is glo onwettig deur middel van ʼn meeluister-apparaat in Senkubuge se kantoor gemaak.

In die klankgreep kan ook gehoor word hoe hulle ander raadslede bespreek en selfs na die speaker van die raad as ʼn heks verwys.

Mokgalapa en Senkubuge het klagte van onder meer afpersing by die Brooklyn-polisiestasie aanhangig gemaak. Hulle beweer die klankgreep is versprei omdat hulle nie wou toegee aan ʼn eis dat vier geskorste werknemers heraangestel word nie.

Die DA sê in ʼn verklaring dat hy die ernstige klagte teen die twee politici met omsigtigheid hanteer. Die saak is na die party se federale regsafdeling verwys waar Mokgalapa en Senkubuge ʼn geleentheid sal kry om hulle weergawe van die gebeure te gee.

Tshwane se speaker het met inagneming van die gedragskode van raadslede ook die saak vir verdere ondersoek na die etiese komitee verwys.

Mokgalapa is deur die party op spesiale verlof geplaas terwyl die ondersoeke aan die gang is. Die verklaring maak geen melding van Senkubuge se lot nie.

Die DA het intussen ook gesê hy neem kennis van die EFF se voorneme om ʼn mosie van wantroue teen Mokgalapa ter tafel te lê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

21 Kommentare

jongste oudste gewildste
Outoppie

En so kom al die hoog aangesteldes wat nie die werk kan doen nie tot ń val

Wielspore

Geen waardes, geen respek, gebrek aan geloof, te veel geld, te veel mag.

K P

Daardie bee moet sy goed vat en padgee. Baie tyd vir vroue maar min vir werk. Wonder of hy n getroude man is?

Rooi Jan

Dit is duidelik dat die DA se tweede span politieke kleuters is. Hulle word gedurig ore aangesit deur die ANC/EFF.

Mm ja nee

Getroud of nie, kulture laat meer as een vrou toe… Maklik soos dit.