Tshwane-werkers beëindig staking

Werkers van die Tshwane-metroraad se staking is verby, nadat hulle die afgelope week groot ontwrigting en skade veroorsaak het. (Foto: Oupa Mokoena/ANA)

Ná dae van geweld en chaos in die Pretoriase middestad, het die Suid-Afrikaanse Munisipale Werkersvakbond (Samwu) met die hulp van ʼn bemiddelingsproses by die plaaslikeregeringsbedingingsraad (SALGBC) ʼn ooreenkoms met die Tshwane-metroraad bereik.

Die staking, wat die middestad lamgelê het, is laat Donderdag beëindig.

Koena Ramotlou, Samwu se algemene sekretaris, het gesê die stakende werkers se grootste beswaar was teen die metroraad se besluit om sy topbestuur salarisverhogings van 18% te gee, maar die laagste besoldigde werkers hierby uit te sluit. Die salarisverhoging vir die bestuur is boonop terugwerkend na 2017.

Ramotlou het gesê die metroraad het sy woord gehou om die voorstelle wat Samwu voorgelê het, te ondersoek. “ʼn Ooreenkoms vir ʼn vreedsame oplossing vir die geskil tussen die stad en die werkers is dus bereik,” het hy gesê.

Een van die punte waarop ooreengekom is, is ʼn ex gratia-betaling aan werkers as ʼn sogenaamde gelykmaker-toelaag.

Werkers wat minder as R20 000 per maand verdien, kry ʼn eenmalige betaling van R15 000. Werkers wat meer as R20 000 verdien, kry ʼn eenmalige betaling van R10 000, terwyl munisipale werkers wat méér as R30 000 verdien, ʼn eenmalige betaling van R7 000 kry.

“In die komende maande gaan ʼn toegewyde taakspan die standaard van salarisskale van ander metrorade ondersoek om ʼn betalingskaal vir die Tshwane-metroraad te ontwikkel.

“Die salarisverhoging van 18% wat vir die groep- en afdelingshoofde ingestel is, gaan onmiddellik gekanselleer word,” het Ramotlou gesê.

“Samwu se doelwit is om die belange van ons werkers te beskerm en hulle werksomstandighede te verbeter.”

Die Tshwane-metroraad het inwoners intussen verseker dat hy alles moontlik sal doen om dienste ná die staking so gou moontlik te herstel.

Die stakers het die afgelope week groot skade en enorme ontwrigting in die middestad veroorsaak.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Amanda

Ai wens ek kan ook n 18% verhoging kry terugwerken na 2010! Wonder wie gaan al die gemors nou opruim.

Anoniem

Hoekom nie die belange van die publiek beskerm nie. Ons betaal deur ons nekke vir diens lewering, maar nee wie moet nou weer vir hierdie gemors betaal. Ons land hardloop met n verskriklike pas agter uit. Hoe kan hulle in elk geval n 18% verhoging terug werkend gee. My verhoging was n skamele 3% het geen keuse nie waag ons om te stike word ons summier af gedank. Hierdie piesang republiek maak my siek man.

Joubert

… en moenie worry nie, ons het agtergekom ons kan die (voorheen) middelklas lojale betalers se rekening maar net met nog so 20% verhoog (ons doen dit mos nou op gereelde basis), dan behoort ons die ekstra bonusse maklik te kan bekostig.

Dis tyd dat ons alternatiewe begin kry vir munispale dienste. Hierdie varke van animal farm gaan elke jaar eenvoudig net meer en meer uit ons wil uitwurg.

karen

en nou gaan die hoofde staak….. want daardie verhoging is klaar spandeer

charmaine

En nou wie gaan dit gemors opruim? Hulle het nou net vir hulle self meer werk gemaak nou moet die munisipale skoonmakers in elk geval hulle rommer gaan opruim.
Dis nou werkskepping!!

Hoop die Oorsee se lande het waargeneem?