Twee aangekla ná vroue kaal moet uittrek by werk

Topbet se Germiston tak. Foto: www.grandgaming.co.za

ʼn Saak van seksuele aanranding word ondersoek ná vrouewerknemers van die Topbet-dobbelonderneming glo gedwing is om hul klere by hul werksplek uit te trek om deursoek te word.

EWN berig sowat 20 vrouewerknemers is by die onderneming se Germiston-tak ondersoek omdat daar glo ʼn klein hoeveelheid menstruele bloed in een van die personeelbadkamers aangetref is.

Dominique Luden, een van die direkteurs van Topbet, het aan Maroela Media bevestig die kwessie is in Februarie, twee dae ná die voorval, deur ʼn senior werknemer onder hul aandag gebring.

Volgens haar is daar onmiddellik ʼn ondersoek na die voorval van stapel gestuur.

“Die ondersoek het daarop gedui dat dié onmenslike en vernederende ondersoek deur een van ons vroueskoonmakers uitgevoer is in opdrag van een van ons vrouetakbestuurders sonder die kennis of magtiging van die Topbet-bestuur,” het Luden gesê.

Luden sê as maatskappy wat deur vroue besit en bestuur word, is vroueregte en hul werknemers se grondwetlike reg op waardigheid, vryheid en veiligheid vir hulle baie belangrik. “Ons is verslae oor die voorval.”

Sy beweer ouer en swanger vroue is nie deursoek nie.

EWN berig egter dat ʼn 52-jarige werknemer glo gesmeek het om nie deursoek te word nie omdat sy reeds deur die menopouse is.

Sy het beweer die soektog is uitgevoer ná niemand verantwoordelikheid wou aanvaar vir die bloed in die badkamer nie. Die bestuurder het toe glo opdrag gegee dat alle vrouewerknemers kaal moet uittrek en ondersoek moet word om vas te stel of hulle menstrueer.

Volgens Luden is daar individuele onderhoude met elke werknemer gevoer en het hulle erken dat hulle nie fisiek aangeraak is nie, maar wel ongelooflik ongemaklik was met die vernederende proses.

Die betrokke takbestuurder is onmiddellik geskors. Die bestuurder is volgens Luden reeds voor die skorsing in hegtenis geneem nadat dieselfde werknemer wat die voorval onder hul aandag gebring het ook ʼn klag by die polisie aanhangig gemaak het.

“Tien dae later het ons vasgestel nóg ʼn klag is deur die werknemer ingedien teen een van die skoonmakers wat betrokke was by die voorval.”

Luden het gesê die fluitjieblaser is ook tydelik geskors, maar het nie onmiddellik redes vir haar skorsing verskaf nie.

Kapt. André de Jager, woordvoerder van die polisie, het aan Maroela Media bevestig dat twee verdagtes reeds in die Germiston-landdroshof verskyn het op ʼn klag van seksuele aanranding. “Die verdagtes is op borgtog vrygelaat en sal weer op 29 Maart in dieselfde hof verskyn.”

Volgens Luden sal daar berading aan die werknemers gebied word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
WAT?

Hoe siek is dit dat ‘n ander VROU haar mede vrouens soos dit behandel! Maak ‘n plan, dis onaanvaarbare gedrag.

Ray

Maar dan ook bygese, dit is vernederend. In al die jare wat ek verkope doen was daar 2 aanlegte waar ek heeltemal moes ontklee en verby een rigting spieëls loop, sonder enige klere/ handdoek of enigiets van die soort.

1. Jy weet nie agter die venster staan nie
2. As besoeker het jy geen keuse of reg
3. Ten minste ‘n handdoek deur hulle verskaf sou menslik wees

Ongelukkig word hierdie goed gedoen en jy is oorgelaat aan die genade van die eienaar/ aandeelhouers van die onderneming.

DAVID

Dit is uiters skokkend dat die tipe gedrag geduld word,geen vrou kan so verneder word nie.Wat het van wedersydse respek geword?Dit is in my oppinie n krimenele oortreding.Alle mense moet met waardigheid en respek behandel word.

Niel

Absoluut skandalig! Hoop hul word vir miljoene gedagvaar!

Theresa B

Hoe walglik is julle net nie!!!