Die polisie in Waterval buite Makhado (Louis Trichardt) in Limpopo het ʼn ondersoek begin nadat twee mense Dinsdagoggend in ʼn winkel doodgebrand het.
Lt.kol. Moatshe Ngoepe, woordvoerder van die polisie, het gesê die voorval het omstreeks 02:30 plaasgevind.
Lede van die gemeenskap het na bewering vlamme op die winkel se dak gewaar en onmiddellik die polisie in kennis gestel.
“Twee mense het doodgebrand en die inhoud van die winkel is heeltemal vernietig,” het Ngoepe gesê.
Volgens Ngoepe is die motief vir die voorval nog nie bekend nie. “Ons kan in dié stadium nie bevestig of vuilspel betrokke was of nie, maar dit is ʼn moontlikheid.”
Enigiemand met inligting oor die voorval is gevra om kapt. Boshomane by 079 894 5501 te bel.