Die twee vragmotorbestuurders wat Woensdag in ʼn ongeluk op die Van Reenenspas in KwaZulu-Natal betrokke was, is in ʼn ernstige toestand hospitaal toe gejaag. Die tenkwa wat ná die ongeluk aan die brand geslaan het, is wel intussen geblus.
Maroela Media het vroeër berig twee vragmotors was net voor 09:00 in die ongeluk op die Van Reenenspas betrokke. Een van die vragmotors was ʼn tenkwa wat ná die ongeluk aan die brand geslaan het. Motoriste is aangeraai om die pas te vermy ná dié groot ongeluk.
Brandweerdienste het net na 10:00 die brand onder beheer gebring.
Robert McKenzie, woordvoerder van die provinsiale nooddienste, sê by paramedici se aankoms op die toneel het hulle die twee vragmotorbestuurders in ʼn ernstige toestand aangetref. Hulle is op die toneel behandel voordat hulle per ambulans na nabygeleë hospitale geneem is.
Volgens die N3-tolpad-konsessie (N3TC) was die noordelike bane by die Tugela Plaza en Tugela East Ramp Plaza Woensdag teen 11:30 steeds vir motoriste gesluit. Die suidelike bane op die Van Reenenspas sal na verwagting binnekort vir motoriste oopgestel word.
Die N3TC het motoriste ook gewaarsku om versigtig in die gebied te ry weens swaar reën wat tot verminderde sig kan lei.
Jammer vir die wat beseer is.
As daaglikse gebruiker van snelwee sien ek hoe sommige trokbestuurders uiters onverantwoordelik bestuur.
Van die 80 km/h spoedgrens nie eers te praat nie.
Metro-polisie skitter in hul afwesigheid.
Ons as padgebruikers moet maar koes-koes deur die verkeer kom