Twee mans is tot lewenslange tronkstraf gevonnis nadat hulle ʼn man beroof en vermoor het nadat hy ʼn uitbetaling van die Padongelukkefonds gekry het.
Baxolele Mxabo (30) en Wanda Dzingwe (29) is in die Mount Frere-streekhof in die Oos-Kaap tot ʼn verdere 20 jaar tronkstraf gevonnis op die aanklag van roof. Die vonnisse sal gelyklopend uitgedien word. ʼn Derde beskuldigde het ʼn staatsgetuie geword.
Mxabo en Dzingwe is skuldig bevind aan die moord op ʼn 55-jarige man in Desember 2018. Die man is aangeval kort nadat hy ʼn uitbetaling van die Padongelukkefonds ontvang het.
Kapt. Khaya Tonjeni, polisiewoordvoerder, het gesê drie mans het die slagoffer se huis die aand van 17 Desember betree en geld geëis. “Hulle het hom vasgebind en hom gemartel terwyl hulle geëis het dat hy sy bankkaarte en PIN-nommers vir hulle gee.”
Volgens Tonjeni het die slagoffer die kaarte en besonderhede verskaf waarna die mans geld uit sy rekening gaan onttrek het. “Hulle het teruggekeer en hom verder gemartel tot hy dood is voordat hulle met ander persoonlike besittings van die toneel gevlug het.”
Die slagoffer se selfoon het speurders na die verdagtes gelei en hulle is sowat ʼn maand na die moord vasgetrek. Beeldmateriaal van kringtelevisiekameras het gewys hoe die beskuldigdes geld uit die oorledene se bankrekening by ʼn bank onttrek het.
‘n Mens het regtig nie meer woorde nie…
20 jaar waarvan 3 jaar uitgedien word want hulle is dan ‘ gerehabiliteer ‘. En die gevangenisse is mos oorvol.