Twee mans is Dinsdag in fratsongelukke in Durban in KwaZulu-Natal beseer.
ʼn 30-jarige man het Dinsdagoggend in Briardene in die noorde van Durban sowat 12 meter ver geval en kop eerste die betonvloer getref.
Shawn Herbst, woordvoerder van Netcare 911, sê paramedici is omstreeks 11:15 na die toneel ontbied. Die man het nuwe dakplate geïnstalleer toe ʼn hegstuk tussen twee plate meegegee het.
“Die man het ʼn beskermingsharnas aangehad, maar die lyn was nie onder spanning toe hy geval het nie. Hy het veelvoudige beserings opgedoen en is op die toneel gestabiliseer.”
Hy is na ʼn hospitaal geneem vir verdere behandeling.
Netcare 911 is daarna omstreeks 12:30 na ʼn sakeperseel in Bothas Hill in die weste van Durban ontbied. “ʼn Man was besig om gras te sny toe die grassnyer oor sy regtervoet gery het,” het Herbst bygevoeg.
Sy voet is gedeeltelik geamputeer en hy is ernstig beseer. Hy is op die toneel gestabiliseer en daarna met ʼn helikopter na ʼn hospitaal geneem vir dringende behandeling.
Sjoe, dit is verskriklik!
Hoe ry jy oor jou eie voet met n grassnyer? Jy loop mos agter die ding nie langs hom nie of hoe?
Maar presies!! Dit was dit ‘n ongeluk! ‘n Ongeluk gebeur binne ‘n fraksie van ‘n sekonde!
Was my eerste reaksie ook… hoe??
Grassnyers is daarop uit om wraaksugtig te wees. In 1993 ry ek met my motorfiets om onderdele vir my grassnyer te gaan kry. Oppad huistoe is ek toe in ‘n kop-aan-kop met ‘n bakkie. Ek land toe in die hospitaal op langs ‘n man wat daardie selfde middag sy hand onder die grassnyer ingedruk en sy vingers verkort het.
Dis nou ń rare manier om jou nuwe jaar te begin.