Twee mans beroof, verkrag Baaise vrou (62)

Argieffoto: Kent Williamson

Die polisie in die Oos-Kaap is op soek na twee verdagtes wat vroeg Saterdagoggend by ʼn huis ingebreek en ʼn 62-jarige vrou beroof en verkrag het.

Volgens die speurders van Walmer, Port Elizabeth, het die klaagster van die buurt Overbaakens omstreeks 03:00 wakker geword van haar honde se geblaf. Nadat sy stemme buite gehoor het, het sy die bure gebel. Terwyl sy nog met die foongesprek besig was, het die verdagtes die kombuisdeur oopgeskop.

Sy het dit reggekry om haar in die motorhuis toe te sluit, maar die mans, wat met messe gewapen was, het ook dié vertrek se deur oopgeskop en haar terug in die huis ingeneem. Hulle het geld van haar geëis en ʼn onbekende bedrag kontant uit haar handsak geneem.

Nadat een van die verdagtes haar in die badkamer verkrag het, het die twee hulle uit die voete gemaak met ʼn selfoon, DVD-speler en kontant toe hulle die polisie hoor aankom.

Die slagoffer is hospitaal toe geneem vir behandeling.

Enigiemand met inligting wat die polisie in hul ondersoek kan help, kan Walmer se speurders by 041 581 1496 of Stop Misdaad by 0860 010 111 bel.