Die polisie in Westenburg buite Polokwane in Limpopo het ʼn groot soektog van stapel gestuur na drie vermeende kapers, van wie twee Saterdag uit aanhouding ontsnap het kort ná hul inhegtenisneming.
Die motor, ʼn Toyota Corolla, wat weer gevind is, is vroeër by ʼn vulstasie in Seshego gekaap.
“Beamptes was op patrollie toe hulle omstreeks 03:00 ʼn verdagte voertuig in Nirvana opgemerk het,” het kol. Moatshe Ngoepe, woordvoerder van die polisie, gesê. “Toe hulle die voertuig wou voorkeer, het die bestuurder weggejaag.”
Die polisie het, met behulp van ʼn plaaslike veiligheidsmaatskappy, die motor agternagesit tot die verdagtes ʼn paar kilometer buite die stad voorgekeer is. “Die bestuurder, gewapen met ʼn vuurwapen, het uitgespring en weggehardloop. Die ander twee verdagtes is in hegtenis geneem. Polisiebeamptes het die motor deursoek en beslag gelê op ʼn 9 mm-vuurwapen en vyf patrone.”
Sake van die besit van ʼn vermoedelik gekaapte motor en die besit van ʼn ongelisensieerde vuurwapen is aanhangig gemaak.
“Die twee verdagtes, Kgomotso Maleka (20) en Bafana Sithole (30) is na Polokwane-polisiestasie vervoer vir aanhouding. Hulle het op die hoek van Grobler- en Kerkstraat in Polokwane egter agter van die bewegende polisievoertuig afgespring. Polisiebeamptes het dadelik na hulle begin soek, maar alle pogings was tevergeefs.”
Enigiemand wat inligting het oor die twee ontsnapte verdagtes of hul medepligtige word versoek om speurderkonstabel Braidon Pheme te kontak by 073 344 6556.
Die polisie se ondersoek oor die omstandighede van die ontsnapping duur voort.
My gooiste….was die motor ‘n oop bakkie of ‘n oop polisiewa waar die agter deur nie gesluit was nie? As jy nie ‘n SA lag nie dan gaan jy huil!
Waarom was hulle nie geboei nie
Ag nee….. Julle kan nie eers ń verkoue in die winter vang nie…. Hoekom was die vangwa se deur nie gesluit nie, ek verstaan nie……
Want daar was bribe betaal….
Hiers n stink vis was iemand bang daar word name genoem VRA MAAR NET
Ha-Ha-Ha !!!!!!!!!!!!!!!
Net in SA. Ondersoek die polisie, inside job.