Twee polisielede skuldig ná vals klagte van rassisme

Twee lede van die Suid-Afrikaanse Polisiediens (SAPD) is skuldig bevind op verskeie kriminele klagte, insluitend crimen injuria. Dit nadat hulle hul eertydse bevelvoerder, lt.kol. Annemarie Oosthuizen, vals aangekla het van rassisme.

Die vakbond Solidariteit, wat Oosthuizen verteenwoordig het, het die hofuitspraak van die streekhof in Noordwes verwelkom, wat die twee lede skuldig bevind het aan aanranding, regsverydeling, meineed en crimen injuria.

“Die uitspraak in die kriminele saak is nie net ʼn oorwinning vir lt.kol. Oosthuizen en Solidariteit nie, maar ook vir enige persoon in die openbare sektor wat valslik van rassisme aangekla of beskuldig is,” sê Renate Barnard, ʼn sektorkoördineerder by Solidariteit. “Dit stuur ʼn duidelike boodskap aan die werkgewer, wat in hierdie geval die staatsdiens is, dat rassisme teenoor wit werknemers ʼn werklikheid is en dat dit in dieselfde ernstige lig beskou moet word as wat hulle rassisme teenoor swart mense beskou.”

Oosthuizen het reeds in 2017 dissiplinêre stappe ingestel teen die twee junior lede onder haar bevel wat hulself skuldig gemaak het aan wangedrag deur sonder toestemming of verlof nie vir werk op te gedaag nie. In hul reaksie op die dissiplinêre stappe het die twee adjudant-offisiere ʼn klag van crimen injuria teen Oosthuizen geopen deur aan te voer dat sy die k-woord gebruik het om na hulle te verwys. ʼn Voormalige intern, Elizabeth Sechele, het egter na vore getree om teen hulle te getuig, al is sy ook later geïntimideer en het vir haar lewe gevrees.

Renate Barnard, Elizabeth Sechele en lt.kol. Annemarie Oosthuizen. (Foto: Verskaf)

Oosthuizen is tydens ʼn departementele verhoor van die SAPD onskuldig bevind op al die aanklagte van wangedrag. Tydens die verhoor is ook bevind dat die adjudant-offisiere en hul getuie blatant onder eed leuens vertel het. “Ongeag die bevinding het die SAPD tot op hede nog geen departementele stappe teen die twee adjudant-offisiere se onregmatige aksie ingestel nie. Solidariteit het toe ʼn arbeidsdispuut ingevolge die Wet op Billike Indiensneming namens Oosthuizen na die arbeidshof in Johannesburg verwys,” sê Barnard.

Barnard sê dit is skokkend dat polisiebeamptes in die polisiediens aan sulke optrede aandadig is. “Dit is nog meer skokkend dat die werkgewer nie optree nie. Versuim deur die werkgewer om teen wangedrag en veral rassisme op te tree, trek sy bevoegdheid sterk in twyfel en laat die vraag ontstaan dit nie doelbewus is nie,” voer Barnard aan.

Vonnisoplegging in die kriminele saak wat meer as drie jaar geduur het, sal op 19 Junie plaasvind. “Ons is verheug oor die uitspraak en dat geregtigheid uiteindelik geskied het. Ons is ook dankbaar vir Lizzie Sechele wat vir die waarheid opgestaan het en sodoende ook vir reg en geregtigheid. Hierdie saak skep ʼn duidelike presedent in ons stryd teen diskriminasie en veral rassisme en dubbelstandaarde in die SAPD,” sluit Barnard af.

Oosthuizen het ook nou ʼn siviele eis teen die polisievakbond Popcru ingedien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
AJ

WELGEDAAN Annemarie en Solidariteit!!! Baie geluk met julle oorwinning!!!

Lizzy Sechele verdien bevordering vir haar integriteit!

As belastingbetaler hoop ek dat die INDIVIDUE die regskoste sal betaal eerder as die staat.

Plaas asb die fotos van die RASSISTIESE KRIMINELE sodat ons hulle kan dophou!

Nie Verbaas

N goeie oorwinning teen rassisme. Kom ons kyk wat gebeur met die twee skuldiges oor hulle laakbare gedrag waaraan hulle skuldig is. Popcru, kry vir julle.

Mariana

Baie geluk aan haar en hopelik sal meer sulke sake ook uitgelig word. Ook aan haar medewerker wat opgestaan het vir die waarheid en vir haar. Wel gedaan.

Alexander

Dankbaar dat geregtigheid hier geseëvier het. Daar is vele ander gevalle waar witmense in staatsdiens onder rassisme gebuk gaan. SAPD sal waarskynlik appelleer, maar mens vertrou tog, dat ten spyte van gekaapte regbank die beslissing gehandhaaf sal word. Dalk sal dit ander amptenare wat onder soortgelyke rassisme gebuk gaan ook aanmoedig om aksie te neem.

Jannie van Niekerk

Daai twee sal absoluut NIKS oorkom nie, want hulle is SWART. Indien die Suid Afrikaanse Regstelsel wel regverdig is, (wat ek sterk betwyfel) moet hulle ten minste drie jaar tronkstraf kry vir Crimen Injuria asook sonder enige voordele soos pensioen en medies uit die SAPD ontslaan word.