Twee seuns, vermoedelik 11 jaar oud, is Donderdagmiddag in ʼn hospitaal opgeneem nadat hulle deur ʼn weerligstraal getref is by ʼn laerskool in Potchefstroom.
Russel Meiring, woordvoerder van ER24, het gesê paramedici is omstreeks 13:30 na die toneel ontbied. “Die twee seuns was in die noodhulpkamer toe paramedici by die toneel opgedaag het. Een van die seuns was in ʼn ernstige toestand en die ander een het matige beserings opgedoen.”
Hy het gesê albei seuns het groot brandwonde opgedoen.
“Die seuns is behandel en het pynverligtingsmedikasie ontvang voor hulle na nabygeleë hospitale geneem is vir verdere behandeling.”