Twee sit lank oor OTM-plofstof

Twee mans van Limpopo is elk 24 jaar tronkstraf opgelê vir die onwettige handeldryf in plofstof.

Trevor Vhonani Mathava (35) en William Kwebityala Majwede (40) is Maandag in die landdroshof op Burgersfort gevonnis, sê kapt. Matimba Maluleke, Valke-woordvoerder.

Die Valke het reeds in Februarie 2014 inligting ontvang oor mense wat plofstof verkoop in die omgewing van Burgersfort, waar platinum volop is, sê Maluleke.

Dié twee is op 27 Februarie daardie jaar in hegtenis geneem nadat lede van die Valke op hulle toegeslaan het. Tydens die optrede is op talle plofstofkomponente beslag gelê.

“Die plofstof was bestem vir bendes misdadigers wat kitsbanke en kontantwaens opblaas,” sê Maluleke.

Tydens hul meer as vier jaar lange verhoor was die twee verdagtes uit op R5 000 borgtog elk.

Die bestuur van die Valke het die vonnisse verwelkom en gesê hulle hoop ʼn sterk boodskap word aan misdadigers oorgedra dat diegene wat hulle skuldig maak aan die onwettige handel in plofstof, vir ʼn baie lang tyd tronk toe gestuur sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.