Die ongelukstoneel. (Foto: Netcare 911)
Twee mense is dood en twee ernstig beseer in ʼn botsing Saterdagaand op die R28 in Luipaardsvlei, Krugersdorp, aan die Wes-Rand.
Shawn Herbst, woordvoerder van Netcare 911, het in ʼn verklaring gesê paramedici is net na 20:00 na ’n toneel naby West Village ontbied waar ʼn motor en bakkie gebots het. Een van die voertuie het ná die botsing aan die brand geslaan.
Volgens Herbst is die Krugersdorp-brand-en-reddingsdienste ook na die toneel ontbied om die vlamme te blus.
“Paramedici het die pasiënte ondersoek en bevind dat ʼn volwasse man en vrou noodlottige beserings opgedoen het.”
Volgens Herbst het twee ander mans ernstige beserings in die botsing opgedoen. Hulle is op die toneel behandel voordat hulle na ʼn hospitaal geneem is vir verdere mediese behandeling.
