Twee mense is Maandagaand dood en agt beseer nadat die bakkie waarin hulle gery het omstreeks 20:00 naby Pietermaritzburg in KwaZulu-Natal gerol en in ʼn kloof beland het.
Chris Botha, ʼn woordvoerder van Netcare 911, het gesê die bakkie het tien persone vervoer. “Die bestuurder het beheer oor die voertuig verloor. Die voertuig het die pad verlaat, teen ʼn steilte af gerol en in ʼn kloof beland,” het Botha gesê.
Die passasiers wat agterop die bakkie gesit het, is uit die voertuig geslinger. Twee mense is op die toneel dood verklaar, vier het ernstige beserings opgedoen en vier is gering beseer. Hulle is na nabygeleë hospitale in die gebied geneem vir verdere behandeling.