Twee sterf toe girokopter neerstort

Argieffoto: ER24

Twee mense is Sondag dood nadat ʼn girokopter in ʼn veld buite Lephalale, Limpopo, neergestort het.

Chitra Bodasing, woordvoerder van ER24, het aan Maroela Media gesê paramedici is omstreeks 18:00 na die toneel ontbied nadat die girokopter in die veld neergestort en aan die brand geslaan het.

“Twee mense se liggame is naby die wrak aangetref. Daar kon ongelukkig niks vir hulle gedoen word nie, en hulle is op die toneel dood verklaar,” het Bodasing gesê.

Kol. Ronel Otto, provinsiale polisiewoordvoerder, het die ongeluk bevestig.