Twee swaar gestraf ná wrede moord, verkragting

Argieffoto.

Twee mans is tot twee keer lewenslange tronkstraf gevonnis vir die moord op ʼn man en die verkragting van sy vrou in Rustenburg verlede jaar.

Lt.kol. Pelonomi Makau, woordvoerder van die polisie, het gesê Joseph Mashava (29) en Shimbuya Munjarazi (28) is Dinsdag in die Noordwes-hooggeregshof, wat in Mokgwase sit, tot ʼn bykomende vyf jaar gevonnis vir huisroof, 15 jaar vir roof met verswarende omstandighede, vyf jaar vir die besit van ʼn onwettige vuurwapen en drie jaar vir die onwettige besit van ammunisie.

Mashava en Munjarazi is gevonnis in verband met die wrede aanval op ʼn egpaar in Januarie verlede jaar in hul huis in Waterfall Village in Rustenburg. Die skuldiges is in Februarie kort ná die aanval in hegtenis geneem.

Maroela Media het destyds berig die egpaar het wakker geword van honde wat blaf. Die man het uitgestap om ondersoek te gaan instel. Toe hy ʼn geruime tyd later nog nie teruggekeer het nie, het die vrou uitgegaan om na hom te gaan soek.

Sy het gesien hoe haar man met twee onbekende mans baklei en het om hulp geskree terwyl sy terug in die huis in gehardloop het. Die mans het egter die eetkamervenster stukkend geslaan om toegang tot die huis te verkry.

Hulle het die deur oopgemaak en die liggaam van die man in die huis ingesleep nadat hulle hom doodgeskiet het. Die mans het daarna die vrou met ʼn pistool aangerand voordat hulle haar verkrag het. Hulle het die kluis se sleutels geëis en sy het dit oorhandig. Hulle het ʼn vuurwapen, juweliersware, ʼn televisiestel, klere en ʼn onbekende bedrag kontant geroof voordat hulle die vrou vasgebind het en te voet gevlug het.

Lt.genl. Baile Motswenyane, provinsiale polisiekommissaris, het die vonnis verwelkom. Sy het gesê hy hoop die vonnis stuur ʼn boodskap uit aan ander misdadigers.