Twee vas wat gaste glo by lodge besteel

Een van die persone wat aangekeer is. (Foto: verskaf)

Twee mans is in hegtenis nadat hulle en nóg ʼn makker glo betrokke was by ʼn voorval waar ʼn Kempton Parkse gesin Maandag in die vroeë oggendure in hul blyplek by ʼn lodge naby Mookgophong (Naboomspruit) in Limpopo besteel is.

Die egpaar se dogter het glo wakker geword en ʼn vreemdeling in die vertrek gesien. Sy het haar ma klaarblyklik stilletjies wakker geknyp, waarna die twee saam se daaropvolgende gille ook die pa wakker gemaak het.

Die verdagte het binne-in die kamer gestaan en van die gille weggehardloop, het Johan de Beer van Heritage Protection Group (HPG) gesê.

Hy het onder meer ʼn selfoon, horlosie, klere en skoene gebuit.

Lede van HPG en Scorpion Security was kort daarna op die toneel en HPG het drie stelle spore van die Diamond Creek Bush Lodge tot naby Mookgophong gevolg.

Volgens De Beer is die eerste verdagte naby die dorp ingehaal en in hegtenis geneem. ʼn Tweede vermeende betrokkene is sowat ʼn halfuur later met die hulp van die gemeenskap en verskeie veiligheidsdienste in die omgewing aangekeer. Van die gesteelde items is by hulle gevind, het hy gesê.

Die verdagtes is aan die polisie oorhandig wat die saak verder sal ondersoek, het hy gesê. Volgens hom sal die mans se moontlike verbintenis met ander soortgelyke voorvalle ook ondersoek word.

Braam Oosthuizen, eienaar van die lodge, het die voorval betreur en gesê die betrokke gaste is ongedeerd.

“Dit is so onnodig dat só iets gebeur; mense kom hierheen om te ontspan. Dit is die eerste keer in tien jaar dat só iets hier gebeur,” het hy gesê.

Die lodge het verskeie veiligheidsmaatreëls, waaronder ʼn elektriese heining en alarmstelsels.

Die boewe het klaarblyklik onder dié heining deurgekruip en só toegang tot die perseel verkry.

Oosthuizen het gesê die veiligheidsdienste het onmiddellik gereageer en ongelooflike moeite gedoen om die vermeende diewe vas te trek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Boerboel

Kan n mens nie eers gaan vakansie hou nie?

Wurmpie

En môre weer op straat

Anoniem

Knap gedaan aan almal wat betrokke was hier . Ek is so dankbasr 2 is gekry hkm ons dorp teiken. Trots op al die mense en gemeenskap !!! Dankie almal so sal ons kriminele uit ons dorp hou !!!!!

Wonner

Glo?

Cherokee

Netjies gedoen! Spoorgesny en hulle ingehaal.