Twee verdrink, een vermis ná huisboot brand

Die huisboot het Saterdag aan die brand geslaan. (Foto: Bathabile Ndawo/Facebook)

Twee mense het Saterdag in die Jozini-dam in KwaZulu-Natal verdrink nadat ʼn huisboot aan die brand geslaan het en hulle noodgedwonge oorboord moes spring. ʼn Derde persoon word steeds vermis.

Die oorledenes, ʼn buitelander en een van die bemanningslede, was glo deel van ʼn groep van nege mense wat die dag op die luukse huisboot Shayamanzi I deurgebring het.

Kapt. Nqobile Gwala, polisiewoordvoerder, het Maandag aan Maroela Media gesê die boot het omstreeks 16:30 in vlamme opgegaan waarna die passasiers en bemanning genoop was om oorboord te spring.

“Almal het in die water gespring, maar ongelukkig het twee mense verdrink.”

Reddingsdienste het die oorledenes se lyke kort daarna uit die dam gehaal.

Alex Mirschel, ʼn inwoner van Duitsland en passasier op die boot, het op Facebook gesê sy pa was een van dié wat verdrink het.

“Ek was deel van die groep wat op die boot was en as gevolg van die ongeluk het ons ook ons pa verloor. Ons het alles verder ook verloor – ons sleutels, paspoorte, bankkaarte, kontant, selfone en klere.”

Hy het ook erken dat hulle gesukkel het om kop bo water te hou weens die onstuimige waters.

Mirschel het gesê sy gesin is tans besig om sy pa se liggaam terug in Duitsland te kry.

Volgens Gwala is polisiebeamptes van die Empangeni soek-en-reddingspan steeds na die vermiste persoon op soek. Dit word vermoed dat dié persoon ook verdrink het.

Die bestuur van die Shayamanzi-huisbote het in ʼn Facebook-plasing hul meegevoel met die familie en vriende van die oorledenes betuig.

“As ʼn gevestigde familiebesigheid is ons platgeslaan oor die gebeure die afgelope naweek en doen ons alles moontlik om met die ondersoek te help en die impak wat dit op ons gaste, bemanning en hul families gehad het, te verstaan.

“Ons gedagtes en gebede is by almal en ons treur saam met julle.’”

Volgens Gwala is die oorsaak van die brand nog nie bekend nie.

Forensiese ondersoekers is op die toneel en ondersoek die saak verder.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

10 Kommentare

jongste oudste gewildste
Toy

Was daar nie brandblussers op die boot nie.

Sandra

Daar was duidelik nie veiligheidsmaatreels in plek nie. Hoekom het hulle nie brandblussers gebruik om die vuur onder bedwang te bring nie? Hoekom moes daar mense verdrink? Is dit omdat daar nie reddingsbaadjies aan boord was nie?

Elmarie

En ruk gelede na ek in reisafdeling in Maroela van die boot/firma gelees het was dit op my emmerskoplysie (as mý skip eendag kom!) maar nou ja, nie méér nie

Chris dupreez

Dis slegte nuus. Daardie is pragtige en baie veilige bote. Wonder wat het verkeerd gegaan

Tino

Dit is sleg