Twee mans wat verlede week betrap is toe hulle brandstof uit ʼn pypleiding in Mpumalanga wou steel, is dood weens die ernstige brandwonde wat hulle in die proses opgedoen het.
Maroela Media het vroeër berig veiligheidsbeamptes het die mans, onderskeidelik 28 en 39 jaar oud, Donderdagaand naby Phola aangekeer nadat die Transnet-beheerkamer ʼn skielike daling in drukking in die pypleiding opgemerk het.
ʼn Brand is in ʼn mielieland daar naby opgemerk en by nadere ondersoek is vasgestel dat die vlamme van die pypleiding af kom. Albei die mans het in daardie stadium reeds ernstige brandwonde opgedoen en is in hegtenis geneem.
Die polisie het ook onder meer beslag gelê op ʼn bakkie, ʼn kragopwekker en verbrande kledingstukke.
Kapt. Dineo Lucy Sekgotodi, woordvoerder van die Valke, het Maandag gesê die twee het in die Witbank-hospitaal aan hul beserings beswyk.
Hulle sou tereg staan op aanklag van kwaadwillige saakbeskadiging, beskadiging van noodsaaklike infrastruktuur en diefstal.