Twee weermaglede in see vermis

Die Suid-Afrikaanse weermag het Maandag bevestig dat twee soldate wat meer as ʼn week gelede in die see aan die Oos-Kaapse kus vermis geraak het, nog nie opgespoor is nie.

Die twee lede was van diens af toe hulle op 16 April vermis geraak het. Hulle het in die see by Port St Johns gaan swem en vermoedelik in die moeilikheid beland toe seetoestande skielik verander het.

Die weermag het Maandag die twee lede geïdentifiseer as Mcedisi Rudolf Mandyu (48) van Worcester, verbonde aan die voetsoldaatskool in Oudtshoorn, en Themba Nelson Sithole (27) van Rustenburg, verbonde aan die valskermbataljon in Bloemfontein.

Brig. Xolani Mabanga, woordvoerder van die weermag, het gesê die soektog na die lede gaan steeds voort. Die vermiste mans se familielede is ingelig en hulle het reeds die toneel waar hul geliefdes vermis geraak het, besoek.