Die VF Plus verwelkom die verskuiwing van twee witrenosters deur die Mpumalanga-agentskap vir toerisme en parke (MTPA) uit die Mthethomusha-wildreservaat.
Die party het vandeesweek ʼn dringende versoek gerig aan Mpumalanga se LUR vir omgewingsake, Vusi Shongwe, om bedreigde wild so spoedig moontlik uit die reservaat te verwyder en die heining te herstel om stroping te voorkom.
Ken Robertson, woordvoerder van die VF Plus, het gesê die twee witrenosters wat verskuif is, het egter reeds deur die beskadigde heining beweeg en is langs ʼn teerpad buite die reservaat gevind. Hulle is verdoof en verskuif na ʼn onbekende plek.
Maroela Media het vroeër berig die reservaat se heining is beskadig en die Bongani Mountain Lodge is afgebrand deur lede van die aangrensende gemeenskap ná die skietdood van ʼn vermeende stroper.
Robertson het gesê die VF Plus sal druk uitoefen op die LUR en MTPA om ook die twee oorblywende witrenosters en ander bedreigde wild te verskuif na ʼn veiliger omgewing.
Ek wens die stropers wil die mooi renosters uitlos!