Tweede grootste dwelmvonds in Noordwes

Mandrax-tablette
(argieffoto)

ʼn 54-jarige vrou is in hegtenis geneem toe sy ʼn polisiebeampte glo met R60 000 wou omkoop toe ʼn dwelmlaboratorium op haar plaas in Boons, sowat 40 km buite Koster gevind is.

Thabo Sematle, waarnemende woordvoerder van die departement van gemeenskapsveiligheid en vervoerbestuur, het Donderdag gesê beamptes was op roetine plaasveiligheidspatrollie toe hulle by ʼn geslote hek stilgehou het. “Volgens inligting het twee mans van die plaas weggehardloop. Die polisie het toegang bekom tot die plaas en ontdek dat dwelms vervaardig word. Die polisie het beslag gelê op dwelmmiddels met ʼn straatwaarde van meer as R8 miljoen,” het Sematle verduidelik.

Die vrou het glo R60 000 aan ʼn polisiebeampte aangebied as omkoopgeld. “Hy het die omkoopgeld van die hand gewys en die vrou is in hegtenis geneem. Sy sal na verwagting Vrydag in die Koster-landdroshof verskyn op aanklag van die vervaardiging en verskaffing van geskeduleerde middels en dwelmhandel.”

Dié dwelmlaboratorium is die tweede grootste dwelmklopjag in Noordwes ná polisiebeamptes in April by die Kopfontein-grenspos dwelmmiddels ter waarde van R70 miljoen in ʼn valse kompartement van ʼn vragmotor gevind het. Die vragmotor was van Botswana na Suid-Afrika op pad. Die beskuldigdes in dié saak sal na verwagting op 28 Oktober in die Zeerust-landdroshof verskyn.