Tweeling op ongelukstoneel gebore

Nooddienswerkers Monique Herbst
Jaco Henrico saam met een van die seuntjies. (Foto: HEMS)

Paramedici moes Woensdagaand kophou nadat hulle nie net verskeie pasiënte op ʼn ongelukstoneel moes behandel nie, maar ook twee babaseuntjies wat nie tot by ʼn hospitaal kon wag nie, net daar op die toneel in die lewe moes help bring.

Leandré Spies, woordvoerder van Hartbeespoort Emergency Medical Services (HEMS), het gesê Miclane Hlongwane (28) se water het gisteraand gebreek en sy, haar man en haar suster het inderhaas na die Brits- provinsiale hospitaal vertrek.

Digby die Econo Langpiet-vulstasie op die R566, net buite Brits in Noordwes, was hulle egter in ʼn botsing met ʼn vragmotor betrokke.

Die passasiersdeur aan Miclane se kant van die bakkie is sodanig beskadig dat paramedici nie daardeur by haar kon uitkom nie. Haar man is dus eers behandel en daarna het ambulansassistente Monique Herbst en Jaco Henrico ingespring om Miclane met die bevalling te help. Die twee seuntjies is sonder voorval in die bakkie gebore en is saam met ma – wat ʼn kopwond opgedoen het – na die hospitaal geneem.

(Foto: HEMS)

Terwyl die paramedici met die bevalling gehelp het, het hulle terselfdertyd besef dat daar nóg ʼn pasiënt – Miclane se suster – agterop die bakkie gesit het. Spies het gesê dié vrou het ʼn hoofbesering opgedoen en is ook na die hospitaal geneem.

Die vragmotorbestuurder is nie beseer nie.

Spies sê Herbst en Henrico is Donderdagmiddag terug na die hospitaal waar hulle geskenke vir die twee klein manne gaan aflaai het. Een van die babas word in hierdie stadium nog in die pediatriese saal versorg, maar albei is perdfris.

Die seuntjies het nog nie name nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

6 Kommentare

jongste oudste gewildste
Piesang05

Ysters. Beide van julle. Repek. Was self 25 jaar in EMS gewees.

agnes

Hulle sal net moet toets die om seker te maak dat hulle nie met Vigs besmet is nie.